ନୂଆ ସରକାର ଆସିବା ପରଠାରୁ ଦୁର୍ନୀତି ଅଭିଯୋଗରେ ୩୦ ସରକାରୀ କର୍ମଚାରୀ ବହିଷ୍କୃତ, ୬୮ ଅବସରପ୍ରାପ୍ତ କର୍ମଚାରୀଙ୍କ ପେନ୍ସନ୍ ବନ୍ଦ
ଭୁବନେଶ୍ୱର, ୨୮/୧୦ : ଦୁର୍ନୀତିର ଅର୍ଥ କ’ଣ ? ବ୍ୟକ୍ତିଗତ ଲାଭ ପାଇଁ ପଦ ପଦବୀର ଅପବ୍ୟବହାର କରିବା ନା ଲୋକେ ଯେଉଁ ବିଶ୍ୱାସ ରଖିଛନ୍ତି ତାପ୍ରତି ବିଶ୍ୱାସ ଘାତକତା କରିବା ? ଦୁର୍ନିତୀ ନିବାରଣ ସପ୍ତାହ ପାଳନ ଅବସରରେ ସରକାରୀ ଅଧିକାରୀମାନଙ୍କୁ ପ୍ରଶ୍ନ କରିଛନ୍ତି ମୁଖ୍ୟମନ୍ତ୍ରୀ ମୋହନ ଚରଣ ମାଝୀ । ଏହା ସହିତ ଯୁବପୀଢ଼ି ଦୁର୍ନୀତିରେ ଲିପ୍ତ ହେବା ନେଇ ମୁଖ୍ୟମନ୍ତ୍ରୀ ଚିନ୍ତା ପ୍ରକଟ କରିଛନ୍ତି ।
ମୁଖ୍ୟମନ୍ତ୍ରୀ ରାଜ୍ୟସ୍ତରୀୟ ଦୁର୍ନୀତି ନିବାରଣ ସଚେତନତା ସପ୍ତାହରେ ମୁଖ୍ୟ ଅତିଥିଭାବେ ଯୋଗ ଦେଇ ପୁଣି ନିଜର ଆଭିମୁଖ୍ୟ ସ୍ପଷ୍ଟ କରିଛି ।
ଦୁର୍ନୀତି ପାଇଁ ସରକାର ଶୂନ୍ୟ ସହନଶୀଳତା ଗ୍ରହଣ କରିଛନ୍ତି ବୋଲି ମୁଖ୍ୟମନ୍ତ୍ରୀ ଦୋହରାଇଛନ୍ତି । ଦୁର୍ନୀତି ବ୍ୟବସ୍ଥାରେ ପ୍ରବେଶ କଲେ, ସାଧାରଣ ଲୋକଙ୍କ ଭରସା ଭାଙ୍ଗିବା ସହିତ ନ୍ୟାୟକୁ ବିକୃତ କରେ, ଦକ୍ଷତାକୁ କ୍ଷୁର୍ଣ୍ଣ କରେ ଏବଂ ଶାସନର ନୈତିକ ବୋଧକୁ ଦୁର୍ବଳ କରେ । ଦୁର୍ନୀତି ବିରୋଧରେ ଲଢ଼ିବା କର୍ତ୍ତବ୍ୟ ନୁହେଁ ବରଂ ନୈତିକ ଦାୟିତ୍ୱ ।
ଆଜିକାଲି ଯୁବ ଅଧିକାରୀମାନେ ଦୁର୍ନୀତିରେ ଲିପ୍ତ ହେବା ନେଇ ମୁଖ୍ୟମନ୍ତ୍ରୀ କ୍ଷୋଭ ପ୍ରକାଶ କରିଛନ୍ତି । ସରକାରୀ ଅଧିକାରୀ ହୋଇ ଲୋକଙ୍କ ସେବା କରିବାକୁ ସ୍ୱପ୍ନ ଦେଖୁଥିଲେ, ସ୍ୱଚ୍ଛ ସେବା ଦେବେ, ସଚ୍ଚୋଟତା ଏବଂ ସାଧୁତା ଅବଲମ୍ବନ କରିବେ ବୋଲି କହୁଥିଲେ, ତାହାର କମ୍ ପ୍ରତିଫଳିତ ଦେଖାଯାଉଛି ।
ଆଇଏଏସ୍ ଏବଂ ଓଏଏସ୍ ପରୀକ୍ଷାରେ ରାଙ୍କ୍ ରଖି ଖବରକାଗଜରେ ପ୍ରଶଂସିତ ହେଉଥିଲେ । ଯେଉଁ ଖବରକାଗଜରେ ପ୍ରଶଂସିତ ହେଉଥିଲେ ଦୁର୍ନୀତି କରିବା ପରେ ସେହି ଖବରକାଗଜରେ ତାଙ୍କର ଖବର ଆସୁଛି ।
ଯେଉଁମାନେ ଆମର ଆଦର୍ଶ ହୋଇଥାଆନ୍ତେ କେବଳ କିଛି ଟଙ୍କା ପାଇଁ ନିଜ ଆଦର୍ଶ ଆଉ ବିଚାରଧାରାକୁ ବିକ୍ରି କରି ଦେଉଛନ୍ତି । କିଛି ଟଙ୍କା ପାଇଁ ଆତ୍ମ ସମ୍ମାନକୁ ବିକ୍ରି କରିଦେଉଛନ୍ତି ।
ଏହା ଦେଖି ରାଜ୍ୟବାସୀ ଚିନ୍ତିତ ହୋଇ ପଡୁଛନ୍ତି ବୋଲି କହିଛନ୍ତି ମୁଖ୍ୟମନ୍ତ୍ରୀ । ଲୋଭ ଏବଂ ଦୁର୍ନୀତିରୁ କିପରି ଦୂରେଇ ରହିବେ ସେଥିପାଇଁ ବିଚାର କରନ୍ତୁ । ଏହା ସହିତ ନିଜ ପାଖରେ ଥିବା ଅଧିକାରୀଙ୍କ ପ୍ରତ୍ୟକ୍ଷ କିମ୍ବା ପରୋକ୍ଷରେ ସଚେତନ କରନ୍ତୁ । ନଚେତ ଭିଜିଲାନ୍ସ ବିଭାଗ କାହାକୁ ଛାଡ଼ିବ ନାହିଁ ବୋଲି ମୁଖ୍ୟମନ୍ତ୍ରୀ ଚେତାଇ ଦେଇଛନ୍ତି ।
ଏହା ସହିତ ମୁଖ୍ୟମନ୍ତ୍ରୀ ପୂର୍ବ ସରକାରଙ୍କ ଉପରେ ମଧ୍ୟ ବର୍ଷିଛନ୍ତି । ବିଗତ ସରକାର କେରାଣ୍ଡି ମାଛକୁ ଧରି ବାଳିଆ ଭଳି ବଡ଼ ବଡ଼ ମାଛଙ୍କୁ ଛାଡ଼ି ଦେଉଥିଲେ । କିନ୍ତୁ ବର୍ତ୍ତମାନ ସରକାର ଭିଜିଲାନ୍ସ ବିଭାଗକୁ ପୂର୍ଣ୍ଣ ସ୍ୱାଧୀନତା ଦିଆଯାଇଛି ।
ବିଗତ ୧୬ ମାସରେ ୭ ଜଣେ ମୁଖ୍ୟ ଯନ୍ତ୍ରୀ, ୫ ଜଣ ତହସିଲଦାର, ୪ ଜଣ ବିଡିଓ, ୧୦ ଜଣ ପୋଲିସ ଅଧିକାରୀ, ଜଣେ ଡିଏଫ୍ଓ ଧରାପଡ଼ିଛନ୍ତି । ଦୁର୍ନୀତି ନିବାରଣ ପାଇଁ ଯାହା ଆବଶ୍ୟକ ସବୁ କିଛି ସରକାର ଯୋଗାଇ ଦେଇଛନ୍ତି ଏବଂ ଆଗକୁ ମଧ୍ୟ ଯୋଗାଇ ଦିଆଯିବ ବୋଲି ମୁଖ୍ୟମନ୍ତ୍ରୀ ପ୍ରତିଶ୍ରୁତି ଦେଇଛନ୍ତି ।
