ରାଜଧାନୀରେ ଚାଞ୍ଚଲ୍ୟ; ପୁରୁଷ ବନ୍ଧୁଙ୍କୁ ହାଣି ଯୁବତୀଙ୍କୁ ଟେକିନେଲେ
ଭୁବନେଶ୍ୱର, ୨୩/୧୨ : ଦିନକୁ ଦିନ ଅସୁରକ୍ଷିତ ହୋଇପଡ଼ୁଛି ରାଜଧାନୀ ଭୁବନେଶ୍ୱର । ଦିନ କି ରାତିରେ ଘରୁ ବାହାରିବ ଅସମ୍ଭବ ହୋଇପଡ଼ୁଛି । ବିଭିନ୍ନ ସମୟରେ ହତ୍ୟା, ଆକ୍ରମଣ, ଛିନତାଇ ଭଳି ଖବର ସାମ୍ନାକୁ ଆସୁଛି । ଏହି କ୍ରମରେ ଏକ ଅପହରଣ ଖବର ଆସିଛି ।
ଦୁଇ ଜଣ ଯୁବକ ଯୁବତୀ ରାତିରେ ଯାଉଥିବା ସମୟରେ ଆକ୍ରମଣ କରି ଯୁବତୀଙ୍କୁ ଅପହରଣ କରାଯାଇଥିବା ନେଇ ସୂଚନା ମିଳିଛି । ଯୁବତୀଙ୍କ ପୁରୁଷ ବନ୍ଧୁ ଆହତ ହୋଇଛନ୍ତି । ତାଙ୍କୁ ମେଡ଼ିକାଲରେ ଭର୍ତ୍ତି କରାଯାଇଛି ।
ତ୍ରିକୋଣୀୟ ପ୍ରେମ ଜନିତ ବ୍ୟାପାରରୁ ଏଭଳି ହୋଥିବା ସନ୍ଦେହ କରାଯାଉଛି । ତେବେ ଏ ନେଇ ମୈତ୍ରୀ ବିହାର ଥାନା ପୋଲିସ ତଦନ୍ତ ଆରମ୍ଭ କରିଛି ।
ନିଳାଦ୍ରୀ ବିହାର ଅଞ୍ଚଳର ଆଶିଷ ସିଂହ ଗତକାଲି ବିଳମ୍ବିତ ରାତି ପ୍ରାୟ ୧.୩୦ ସମୟରେ ଲୁମ୍ବିନି ବିହାର ଅଞ୍ଚଳରେ ଏକ ଦୁଇ ଚକିଆ ଗାଡ଼ିରେ ଯାଉଥିଲେ ।
ଉତ୍କଳ ହସ୍ପିଟାଲରୁ ଜାଭିୟର ରୋଡରେ ଯାଉଥିବାବେଳେ ୪ ଜଣ ଦୁର୍ବୃତ୍ତ ଏକ ଧଳା ସ୍ୱୁଇପ୍ଟ ଗାଡ଼ିରେ ଆସିଥିଲେ । ଆଶିଷ ସିଂହଙ୍କୁ ଛୁରୀରେ ଆକ୍ରମଣ କରିଥିଲେ । ଏହା ପରେ ତାଙ୍କ ବାନ୍ଧବୀଙ୍କୁ ଅପହରଣ କରି ନେଇ ଫେରାର ହୋଇଯାଇଥିଲେ ।
ଅପହରଣକାରୀଙ୍କ ଆକ୍ରମଣରେ ଯୁବକ ମଧ୍ୟ ଆହତ ହୋଇଛନ୍ତି । ତାଙ୍କୁ ମେଡ଼ିକାଲରେ ଭର୍ତ୍ତି କରାଯାଇଛି । ଏ ନେଇ ମୈତ୍ରୀ ବିହାର ଥାନାରେ ଅଭିଯୋଗ ହୋଇଛି ।
ଯୁବକ ଜଣକ ଅପହରଣକାରୀଙ୍କୁ ଚିହ୍ନି ନ ଥିବା କହିଛନ୍ତି । ପୋଲିସ ଆହତ ଯୁବକଙ୍କ ବୟାନ ଆଧାରରେ ତଦନ୍ତ ଆରମ୍ଭ କରିଛି । ବିଭିନ୍ନ ସ୍ଥାନରେ ଲଗାଯାଇଥିବା ସିସିଟିଭି ଫୁଟେଜକୁ ମଧ୍ୟ ଯାଞ୍ଚ କରାଯାଉଛି ।
