କୋଭିଡ କଟକଣା ମଧ୍ୟରେ ବୌଦ୍ଧ ଶ୍ରୀ ଜଗନ୍ନାଥ ମନ୍ଦିର ପରିସରରେ ସଂପୂର୍ଣ୍ଣ ହେଲା ଠାକୁରଙ୍କର ରଥଯାତ୍ରା
କମ୍ଭୁଧର କ୍ଷେତିଙ୍କ ରିପୋର୍ଟ
ବୌଦ୍ଧ; ୧୨/୭ : କୋଭିଡ କଟକଣା ମଧ୍ୟରେ ବୌଦ୍ଧ ଶ୍ରୀ ଜଗନ୍ନାଥ ମନ୍ଦିର ପରିସରରେ ସ୍ୱଳ୍ପ ସେବାୟତଙ୍କୁନେଇ ଆଜି ଠାକୁରଙ୍କର ରଥଯାତ୍ରା ସଂପୂର୍ଣ୍ଣ ହୋଇଛି । ଗତକାଲି ରାତିରେ ଠାକୁରଙ୍କୁ ସେନାପଟା ଲାଗି କରାଯାଇ ବେଶକାରୀ ମାନେ ପହଣ୍ଡି ବେଶରେ ସଜ୍ଜିତ କରିଥିଲେ । ଆଜି ସକାଳେ ଠାକୁରଙ୍କର ମଙ୍ଗଳ ଆଳତୀ, ନିତ୍ୟ ଭୋଗ ଲାଗିହେବାପରେ ଚତୁର୍ଦ୍ଦାହମୂର୍ତ୍ତିଙ୍କୁ ଚକାଛଡା ନୀତି କରାଯାଇ ପହଣ୍ଡିବିଜେ କରାଯାଇଥିଲା । ସହରର ପୋଡାପଡା ଓ ନୁଆସାହୀ ଟାହିଆ ସେବକମାନେ ଟାହିଆ ତିନି ଠାକୁରଙ୍କୁ ଲାଗି କରାଯିବାପରେ ବ୍ରାହ୍ମଣ ସେବକମାନେ ସଂକୀର୍ତ୍ତନ୍ୟ ମଣ୍ଡଳୀସହ ମନ୍ଦିରର ଚର୍ତୁପାଶ୍ୱର୍ରେ ଚାରିବେଢା ଠାକୁରଙ୍କୁ ପହଣ୍ଡି କରି ମନ୍ଦିର ପରିସରରେ ଥିବା ଅସ୍ଥାୟୀ ମାଉସୀ ମା ମନ୍ଦିରରେ ପ୍ରବେଶ କରାଇଥିଲେ । ଏହି ମାଉସୀ ମା ମନ୍ଦିରରେ ନବଦିନ ବ୍ୟପି ଠାକୁର ମାନେ ଦଶଅବତାର ବେଶରେ ଭକ୍ତଙ୍କୁ ଦର୍ଶନ ଦେବେ । ଜିଲ୍ଲା ଦେବୋତ୍ତର ନିର୍ବାହୀ ଅଧିକାରୀ ଅଶ୍ୱିନୀ କୁମାର ମେହେରଙ୍କ ତତ୍ୱାବଧାନରେ ମନ୍ଦିର ପରିଚାଳନା କମିଟି ଓ ବ୍ରାହ୍ମଣ ସମାଜ ଓ ବୌଦ୍ଧ ପୋଲିସର ମିଳିତ ସହଯୋଗରେ ଠାକୁରଙ୍କର ଏହି ଯାତ୍ରା ସୁରୁଖୁରୁରେ ସଂପୁର୍ଣ୍ଣ ହୋଇଥିଲା । ମନ୍ଦିରର ମୁଖ୍ୟ ପୁଜକ ସୁରମଣୀ ପଣ୍ଡା,ସହପୁଜକ ବିଭୁଦତ୍ତ ପଣ୍ଡା, ସନ୍ତୋଷ ଶତପଥି ପ୍ରମୁଖ ଠାକୁରଙ୍କର ସମସ୍ତ ନୀତି ସମ୍ପର୍ଣ୍ଣ କରିଥିଲେ ।
ବୌଦ୍ଧଜିଲ୍ଲାର ନୂତନ ଆରକ୍ଷୀ ଅଧିକ୍ଷକ ଭାବରେ ଜ୍ଞାନ ରଂଜନ ମହାନ୍ତିଙ୍କ ଦାୟିତ୍ୱ ଗ୍ରହଣ
ବୌଦ୍ଧ,୧୨/୭ : ବୌଦ୍ଧଜିଲ୍ଲାର ନୂତନ ଆରକ୍ଷୀ ଅଧିକ୍ଷକ ଭାବରେ ଜ୍ଞାନ ରଂଜନ ମହାନ୍ତି ସୋମବାର କାର୍ଯ୍ୟରେ ଯୋଗଦେଇଛନ୍ତି । ଶ୍ରୀମହାନ୍ତି ପୂର୍ବରୁ ଭୁବନେଶ୍ୱରସ୍ଥିତ ଓଡ଼ିଶା ପୋଲିସର ଅର୍ଥନୈତିକ ଅପରାଧ ଶାଖାରେ ଅତିରିକ୍ତ ଆରକ୍ଷୀ ଅଧିକ୍ଷକ ଭାବରେ କାର୍ଯର୍୍ୟରତ ଥିଲେ । ଗତ ୩୦ ତାରିଖ ଦିନ ଭି.ରଘୁନାଥ ରାଓ ଆରକ୍ଷୀ ଅଧିକ୍ଷକ ପଦବୀରୁ ଅବସର ଗ୍ରହଣ କରିବା ପରେ ଏହି ଗୁରୁତ୍ୱପୂର୍ଣ୍ଣ ପଦବୀ ଖାଲି ରହିଥିଲା । ତେବେ ନୂତନ ଆରକ୍ଷୀ ଅଧିକ୍ଷକ ଜିଲ୍ଲାରେ ଦାୟିତ୍ୱ ଗ୍ରହଣ କରିବା ପୂର୍ବରୁ ବୌଦ୍ଧ କନ୍ଧମାଳ ସୀମାନ୍ତରେ ମାଓବାଦୀମାନେ ନିଜର ସ୍ଥିତି ଜାହିର କରିବାସହ ଜିଲ୍ଲା ପୋଲିସ ପାଇଁ ଏକ ନୂତନ ଚ୍ୟାଲେଂଜ ସୃଷ୍ଟି କରିଛନ୍ତି । ଜିଲ୍ଲାରେ ଗଂଜେଇ ମାଫିଆମାନେ ଅଧିକ ସକ୍ରିୟ ହେବା ସହିତ ବ୍ୟାପକ ଭାବରେ ନିଶାଦ୍ରବ୍ୟର କାରବାର ମଧ୍ୟ ବୃଦ୍ଧି ପାଇବା ସହିତ ବିଭିନ୍ନ ଅପରାଧିକ କାର୍ଯ୍ୟକଳାପ ବୃଦ୍ଧି ପାଉଛି । ଏହାବ୍ୟତୀତ ଆଗକୁ ପଞ୍ଚାୟତ ଓ ପୌର ନିର୍ବାଚନ ମଧ୍ୟ ପାଖେଇ ଆସୁଛି । ତେଣୁ ନୂତନ ଭାବରେ ଜିଲ୍ଲା ପୋଲିସର ମୁଖ୍ୟ ଭାବରେ ଦାୟିତ୍ୱ ଗ୍ରହଣ କରିବାପରେ ଶ୍ରୀମହାନ୍ତି କିପରି ଏସବୁ ସମସ୍ୟାର ମୁକାବିଲା କରୁଛନ୍ତି ତାହାକୁ ନେଇ ଜିଲ୍ଲାବାସୀଙ୍କ ମଧ୍ୟରେ ଉତ୍କଣ୍ଠା ପ୍ରକାଶ ପାଇଛି ।