ମାଓବାଦକୁ ମୁହଁ ମୋଡ଼ିଲେ, ଅସ୍ତ୍ର ଛାଡ଼ି ଆତ୍ମସମର୍ପଣ କଲେ ୭୨ ମାଓବାଦୀ
ମାଲକାନଗିରି , ୨୯/୧୦ : ଛତିଶଗଡରେ ଜାରି ରହିଛି ମାଓବାଦୀଙ୍କ ଆତ୍ମସମର୍ପଣ । କାଙ୍କେର ଜିଲ୍ଲାରେ ପୁଣି ୨୧ ଜଣ ହାର୍ଡକୋର ନକ୍ସଲ ୧୮ଟି ଅତ୍ୟାଧୁନିକ ବନ୍ଧୁକ ସହ ପୋଲିସ ନିକଟରେ ଆତ୍ମସମର୍ପଣ କରିଛନ୍ତି । ମାଓ ସଂଗଠନ ଛାଡି ସମାଜର ମୁଖ୍ୟ ସ୍ରୋତରେ ସାମିଲ ହୋଇଥିବା ଲାଲ୍ ବାହିନୀକୁ ରେଡ୍ କାର୍ପେଟ୍ ଉପରେ ସ୍ୱାଗତ କରାଯାଇଛି । ବସ୍ତର ଆଇଜି ପି. ସୁନ୍ଦରରାଜ ଆତ୍ମସମର୍ପଣ କରିଥିବା ମାଓବାଦୀ ମାନଙ୍କୁ ସମ୍ବିଧାନର ବହି ପ୍ରଦାନ କରି ସମାଜରେ ମୁଖ୍ୟସ୍ରୋତକୁ ସ୍ୱାଗତ କରିଛନ୍ତି ।
ଦେଶରେ ନକ୍ସଲବାଦକୁ ମୂଳପୋଛ କରିବା ପାଇଁ ଚାଲିଥିବା ଅଭିଯାନରେ ପୋଲିସ ରଣନୀତି ପରିବର୍ତ୍ତନ କରିଛି । ଏବେ ଏନକାଉଣ୍ଟର ନୁହେଁ ବରଂ ମାଓବାଦୀଙ୍କ ଆତ୍ମସମର୍ପଣକୁ ଅଧିକ ପ୍ରାଥମିକତା ଦିଆଯାଉଛି । ମାଓବାଦୀଙ୍କୁ ସ୍ପଷ୍ଟ ବାର୍ତ୍ତା ଦିଆଯାଇଥିଲା ଯେ ସେମାନେ ଆତ୍ମସମର୍ପଣ କରନ୍ତୁ ନଚେତ୍ ସୁରକ୍ଷାକର୍ମୀଙ୍କ ପକ୍ଷରୁ ଜୋରଦାର କାର୍ଯ୍ୟାନୁଷ୍ଠାନ କରାଯିବ । ପୋଲିସର ଏହି ନୂତନ ରଣନୀତିର ପ୍ରଭାବ ଆରମ୍ଭ ହୋଇଛି ।
ଜଗଦଲପୁରରେ ୨୦୮ ଜଣ ମାଓବାଦୀ, ୧୦୯ଟି ଅସ୍ତ୍ରଶସ୍ତ୍ର ସହିତ ଆତ୍ମସମର୍ପଣ କରିବା ପରେ କାଙ୍କେର ଜିଲ୍ଲାରେ ପୁଣି ୨୧ ଜଣ ନକ୍ସଲ ୧୮ଟି ଅସ୍ତ୍ରଶସ୍ତ୍ର ସହ ପୋଲିସ ନିକଟରେ ଆତ୍ମସମର୍ପଣ କରିଛନ୍ତି । ଆଇଜି ପି. ସୁନ୍ଦରରାଜ କହିଛନ୍ତି ଯେ, ପୂର୍ବରୁ ମାଓ ସଂଗଠନରେ ୪୫ ଜଣ କେନ୍ଦ୍ରୀୟ ସଦସ୍ୟ ରହିଥିବା ବେଳେ ଏବେ ମାତ୍ର ୬ରୁ ୭ଜଣ ରହିଛନ୍ତି । ସେମାନେ ଦକ୍ଷିଣ ବସ୍ତର ଜଙ୍ଗଲରେ ଲୁଚି ରହିଛନ୍ତି । ସେମାନଙ୍କୁ ପୁଣି ଥରେ ଆତ୍ମସମର୍ପଣ କରି ଶାନ୍ତିର ପଥ ଗ୍ରହଣ କରିବାକୁ ଅପିଲ କରିଛନ୍ତି ବସ୍ତର ଆଇଜି ।
