ମା ମାହେଶ୍ୱରୀଙ୍କ ପୀଠରେ ଷୋହଳ ପୂଜା ପାଇଁ ପ୍ରସ୍ତୁତି ବୈଠକ
କମ୍ଭୁଧର କ୍ଷେତିଙ୍କ ରିପୋର୍ଟ
ବୌଦ୍ଧ,୨୫/୯ : ବୌଦ୍ଧଜିଲା ହରଭଙ୍ଗା ବ୍ଲକ ବାମଣ୍ଡା ଗ୍ରାମରେ ପୂଜା ପାଉଥିବା ମା ମାହେଶ୍ୱରୀଙ୍କ ମନ୍ଦିରରେ ଷୋହଳ ପୂଜା ପାଇଁ ଏକ ପ୍ରସ୍ତୁତି ବୈଠକ ସଭାପତି ଗରୁଡଧ୍ୱଜ ପ୍ରଧାନଙ୍କ ଅଧ୍ୟକ୍ଷତାରେ ଅନୁଷ୍ଠିତ ହୋଇଯାଇଛି । ଡୁମ୍ବାଳ ସମାଜର ଇଷ୍ଟଦେବୀ ଭାବରେ ପୂଜା ପାଉଥିବା ମା ମାହେଶ୍ୱରୀଙ୍କ ଷୋହଳ ପୂଜା ଚଳିତବର୍ଷ ଆଡମ୍ବର ସହକାରେ ଓ ଶୃଙ୍ଖଳାର ସହିତ ପାଳନ କରାଯିବାକୁ ବୈଠକରେ ନିଷ୍ପତି ଗ୍ରହଣ କରାଯାଇଥିଲା ।
ଏହି ପ୍ରସ୍ତୁତି ବୈଠକରେ ବୌଦ୍ଧ ସହର ସମେତ ୧୯ ଖଣ୍ଡ ଗ୍ରାମର ଗ୍ରାମ୍ୟ କମିଟି ସଭାପତି ଓ ସମ୍ପାଦକମାନେ ଯୋଗଦେଇ ଥିଲେ । । ପ୍ରତ୍ୟେକ ଡୁମ୍ବାଳ ପରିବାରୁ କିଛି ଆର୍ଥିକ ସହଯୋଗ ଯୋଗାଇଦେବା ସହିତ ଷୋହଳ ପୂଜାରେ ପ୍ରତ୍ୟେକ ପରିବାରରୁ ଜଣେ ଲେଖାଏଁ ସଦସ୍ୟ ସାମିଲ ହୋଇ ସେବା ଯୋଗାଇଦେବାକୁ ନିଷ୍ପତି ଗ୍ରହଣ କରାଯାଇଥିଲା । ପ୍ରସ୍ତୁତି ବୈଠକକୁ ବାମଣ୍ଡା କେନ୍ଦ୍ର ସମ୍ପାଦକ କୈଳାଶ ବିଶି ପରିଚାଳନା କରିଥିଲେ ।
କ୍ରସର ବନ୍ଦ କୁ ଜିଲା ପ୍ରଶାସନର ମୋହର, ଆଉ ହେବନାହିଁ ବ୍ଳାଷ୍ଟିଙ୍ଗ
ବୌଦ୍ଧ,୨୫/୯: ବୌଦ୍ଧ ଜିଲା ହରଭଂଗା ବ୍ଳକର ଖରଭୂଇଁ ଅଂଚଳରେ ରହିଥିବା ସମସ୍ତ କ୍ରସର ଗୁଡିକ ସବୁଦିନ ପାଇଁ ବନ୍ଦ କରାଯିବା ସହ ସମସ୍ତ ପଥର କ୍ୱାରୀ ଲିଜ ବାତିଲ କରାଯିବା ନେଇ ଜିଲା ପ୍ରଶାସନ ସହମତି ପ୍ରକାଶ କରିଛି । ଏହା ସହ କ୍ରସର ଗୁଡିକରେ ଜମା ହୋଇ ରହିଥିବା ପଥର ଓ ମେଟାଲ ସବୁ ଆଗାମୀ ଏକ ମାସ ମଧ୍ୟରେ ଅନ୍ୟ ଅଂଚଳକୁ ପରିବହନ କରାଯିବାକୁ ସମସ୍ତ ପକ୍ଷ ରାଜି ହୋଇଛନ୍ତି ।
ଦିର୍ଘ ତିନି ମାସ ହେଲା ଚାଲିଥିବା କ୍ରସର ବନ୍ଦ ଆନ୍ଦୋଳନ ଓ ଆନ୍ଦୋଳନକାରୀମାନଙ୍କ କଥା ପ୍ରଶାସନ ରଖିଥିବାରୁ ଗ୍ରାମବାସୀମାନେ ଖୁସିପ୍ରକାଶ କରିବା ସହ ପ୍ରଶାସନ ଓ ଜିଲାପାଳଙ୍କୁ ଧନ୍ୟବାଦ ଦେଇଛନ୍ତି । ଜିଲା ପ୍ରଶାସନ ପକ୍ଷରୁ କ୍ରସର ବନ୍ଦ ଆନ୍ଦୋଳନ ନେଇ ଜିଲାପାଳଙ୍କ କାର୍ଯ୍ୟାଳୟରେ ଏକ ବୈଠକ ଜିଲାପାଳ ଲଲାଟେନ୍ଦୁ ମିଶ୍ରଙ୍କ ଅଧ୍ୟକ୍ଷତାରେ ଅନୁଷ୍ଠିତ ହୋଇଥିଲା ।
ବୈଠକରେ ଏସ୍ପି , ଉପଜିଲାପାଳ, ହରଭଙ୍ଗା ବ୍ଲକ ଅଧ୍ୟକ୍ଷ, ୯ନଂ ଜିଲ୍ଲାପରିଷଦ ସଭ୍ୟ, କ୍ରସର ମାଲିକ, ଗ୍ରାମବାସୀ, ମା ବୁଢିଠାକୁରାଣୀ ମଂଚ ସଭାପତି ,ସ୍ୱୟଂ ସହାୟକ ଗୋଷ୍ଠୀର କର୍ମକର୍ତାମାନେ ସାମିଲ ହୋଇଥିଲେ । ଦିର୍ଘ ସମୟର ଆଲୋଚନା ପରେ ସମସ୍ତଙ୍କ ସହମତିରେ ସମସ୍ତ କ୍ରସର ବନ୍ଦ , ପଥର କ୍ୱାରୀ ଲିଜ ବାତିଲ ଏବଂ ଅନ୍ୟାନ୍ୟ ନିଷ୍ପତି ନେଇ ଜିଲାପାଳ ଘୋଷଣା କରିଥିଲେ ।
ମହୁ ସଂଗ୍ରହ ପାଇଁ ଯାଇଥିବା ଯୁବକର ମୃତ ଦେହ ଉଦ୍ଧାର
ବୌଦ୍ଧ,୨୫/୯: ବୌଦ୍ଧ ଆଦର୍ଶଥାନା ବଘିଆପଡା ଫାଣ୍ଡି ଅନ୍ତର୍ଗତ ଟକରପଡା ଗ୍ରାମ ପଞ୍ଚାୟତ ଭେଜିପଦର ଗ୍ରାମର ଜଣେ ଯୁବକ ଗତକାଲି ରାତ୍ରିରେ ମହୁ ସଂଗ୍ରହ ପାଇଁ ଜଙ୍ଗଲକୁ ଯାଇଥିବାବେଳେ ଏକ ଗଛତଳେ ତାଙ୍କର ମୃତ ଦେହ ଜଙ୍ଗଲରୁ ଉଦ୍ଧାର କରାଯାଇଛି । ମିଳିଥିବା ସୂଚନା ମୁତାବକ ଭେଜିପଦର ଗ୍ରାମର ରତ୍ନାକର ମଲ୍ଲିକଙ୍କ ପୁଅ ପ୍ରଦୀପ ମଲ୍ଲିକ(୩୫) ଗତ ଶୁକ୍ରବାର ସନ୍ଧ୍ୟାରେ ମହୁ ସଂଗ୍ରହ କରିବାକୁ ଗ୍ରାମ ନିକଟସ୍ଥ ଜଙ୍ଗଲକୁ ଯାଇଥିଲେ । ଗୋଟିଏ ଗଛରେ ଚଢି ମହୁ ସଂଗ୍ରହ କରୁଥିବାବେଳେ ଅସାବଧାନତା
ବଶତଃ ଖସିପଡିବା କିମ୍ବା ମହୁ ମାଛିଙ୍କ ଆକ୍ରମଣ ଯୋଗୁଁ ଗଛରୁ ପଡିଯିବା ଫଳରେ ଘଟଣାସ୍ଥଳରେ ତାଙ୍କର ମୃତ୍ୟୁ ହୋଇଯାଇଥିବା ଜଣାପଡିଛି । ତେବେ ପରିବାରଲୋକ ଏହି ଘଟଣା ସଂପର୍କରେ ସୂଚନା ପାଇବା ପରେ ଗତକାଲି ରାତ୍ରିରେ ସେଠାରେ ପହଞ୍ଚିବା ପୂର୍ବରୁ ପ୍ରଦୀପଙ୍କ ମୃତ୍ୟୁ ହୋଇସାରିଥିଲା । ଏ ସଂପର୍କରେ ସୂଚନା ପାଇ ବଘିଆପଡା ଫାଣ୍ଡି ପୋଲିସ ପହଞ୍ଚି ଶବକୁ ଜବତ କରିବା ସହିତ ଆମ୍ବୁଲାନସ ଯୋଗେ ବୌଦ୍ଧ ଡାକ୍ତରଖାନାକୁ ପଠାଇଥିଲେ । ଶବ ବ୍ୟବଛେଦ ପରେ ପରିବାରଲୋକଙ୍କୁ ହସ୍ତାନ୍ତର କରାଯାଇଥିବାବେଳେ ପୋଲିସ ପକ୍ଷରୁ ଘଟଣାର ତଦନ୍ତ ଆରମ୍ଭ ହୋଇଥିବା ଜଣାଯାଇଛି ।