୫ଟି ସଚିବଙ୍କ ଦିନିକିଆ ବୌଦ୍ଧଜିଲ୍ଳା ଗସ୍ତ, ଲୋକଙ୍କ ଅଭିଯୋଗ ଶୁଣିଲେ ଏବଂ ବିଭିନ୍ନ ପ୍ରକଳ୍ପର ସମୀକ୍ଷା କଲେ
କମ୍ଭୁଧର କ୍ଷେତିଙ୍କ ରିପୋର୍ଟ
ବୌଦ୍ଧ,୬/୭ : ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ପ୍ରତିନିଧି ଭାବରେ ତାଙ୍କର ବ୍ୟକ୍ତିଗତ ସ୍ୱତନ୍ତ୍ର ସଚିବ ତଥା ୫ ଟି ସଚିବ ଭି. କାର୍ତ୍ତିକେୟନ ପାଣ୍ଡିଆନ ଦିନିକିଆ ବୌଦ୍ଧଜିଲ୍ଲା ଗସ୍ତରେ ବୌଦ୍ଧ ଓ କଣ୍ଟାମାଳ ନିର୍ବାଚନ ମଣ୍ଡଳୀର ବିଭିନ୍ନ କାର୍ଯ୍ୟକ୍ରମରେ ଯୋଗଦେବା ସହିତ ସିଧାସଳଖ ଲୋକଙ୍କ ଅଭିଯୋଗ ଶୁଣିଥିଲେ । ଏଥିସହିତ ଲୋକଙ୍କ ସହିତ ଆଲୋଚନା କରି ବିଭିନ୍ନ ସମସ୍ୟା ସଂପର୍କରେ ଅନୁଧ୍ୟାନ କରିବା ସହିତ ରାଜ୍ୟ ସରକାରଙ୍କ ପକ୍ଷରୁ ଚାଲିଥିବା ବିଭିନ୍ନ ଜନକଲ୍ୟାଣକାରୀ ଯୋଜନାର କାର୍ଯ୍ୟକାରିତା ନେଇ ସମୀକ୍ଷା କରିଥିଲେ ।
ବୁଧବାର ସକାଳୁ ସୁବର୍ଣ୍ଣପୁର ଜିଲ୍ଲା ସର୍କିଟହାଉସଠାରୁ ବାହାରି ହେଲିକେପଟର ଯୋଗେ ବୌଦ୍ଧଜିଲ୍ଲା କଣ୍ଟାମାଳ ନିର୍ବାଚନ ମଣ୍ଡଳୀର ଆମ୍ବଗାଁ ଜନତା ଉଚ୍ଚବିଦ୍ୟାଳୟ ପଡିଆଠାରେ ଅବତରଣ କରି ଆୟୋଜିତ ସଭାରେ ଯୋଗଦେଇ ତିନି ବ୍ଳକର ମେଗା ପାଇପ ୱାଟର ସପ୍ଲାଇ କାର୍ଯ୍ୟର ସମୀକ୍ଷା କରିଥିଲେ । ପରେ ସାଧାରଣଲୋକଙ୍କ ଅଭିଯୋଗ ଶୁଣିବା ସହିତ ତତ୍କାଳ ସମାଧାନ ପାଇଁ ବିଭାଗୀୟ କର୍ତ୍ତୃପକ୍ଷଙ୍କୁ ନିର୍ଦ୍ଦେଶ ଦେଇଥିଲେ ।
୫ଟି ଉଚ୍ଚ ବିଦ୍ୟାଳୟ ଆମ୍ବଗାଁ ପରିଦର୍ଶନ କରି ଛାତ୍ରଛାତ୍ରୀମାନଙ୍କ ସହିତ ସିଧାସଳଖ ଆଲୋଚନା କରିଥିଲେ । ସେଠାରୁ ଶ୍ରୀ ପାଣ୍ଡିଆନ ହେଲିକେପଟର ଯୋଗେ ଆସି ବୌଦ୍ଧ ଜିଲ୍ଲା ଷ୍ଟାଡିୟମଠାରେ ଓହ୍ଲାଇ ସେଠାରେ ମିଶନ ଶକ୍ତି,ମହିଳା ସ୍ୱୟଂସହାୟକ ଗୋଷ୍ଠୀର ମହିଳାମାନଙ୍କ ସହିତ ଆଲୋଚନା କରି ସେମାନଙ୍କ ପାଇଁ କାର୍ଯ୍ୟକାରୀ ହେଉଥିବା ବିଭିନ୍ନ ସରକାରୀ ଯୋଜନା ସଂପର୍କରେ ସମୀକ୍ଷା କରିଥିଲେ । ବିଜୁ ଆଦର୍ଶ କୃଷକ ବଜାରଠାରେ ମିଶନ ଶକ୍ତି କାଫେଠାରେ ପହଞ୍ଚି ସ୍ୱୟଂସହାୟକ ଗୋଷ୍ଠୀ ସହିତ ସେମାନଙ୍କ ଜୀବନ ଜିବିକା ନେଇ ଆଲୋଚନା କରିଥିଲେ ।
ସେଠାରେ ଆୟୋଜିତ ବୁଣାକାର ସମ୍ମିଳନୀରେ ସେମାନଙ୍କ ସମସ୍ୟା ସଂପର୍କରେ ଆଲୋଚନା କରିଥିଲେ । ପରେ ମର୍ଜାକୁଦ ସେତୁ ବୁଲି ଦେଖିଥିଲେ । ସେଠାରୁ ଜିଲ୍ଲା ସଂଗ୍ରହାଳୟ ବୁଲି ଦେଖିବା ସହିତ ସେଠାରେ ବିଭିନ୍ନ ସଂଗଠନର କର୍ମକର୍ତ୍ତା,ବୁଦ୍ଧିଜିବୀ,ବରିଷ୍ଠ ନାଗରିକ,କଳାକାର,ଚିତ୍ରଶିଳ୍ପୀ,ସାଂସ୍କୃତିକ ଅନୁଷ୍ଠାନ,ଗଣମାଧ୍ୟମ ସଂଗଠନ ସହିତ ସେମାନଙ୍କର ସମସ୍ୟା ଓ ଜିଲ୍ଲାର ବିକାଶ ନେଇ ବିଭିନ୍ନ ପ୍ରସ୍ତାବ ସଂପର୍କରେ ଆଲୋଚନା କରିଥିଲେ । ଶ୍ରୀ ପାଣ୍ଡିଆନ ସେଠାରୁ ଚନ୍ଦ୍ରଚୂଡ ମନ୍ଦିର ନିକଟରେ ନିର୍ମାଣାଧିନ ଆଳତୀଘାଟ ବୁଲି ଦେଖିବା ସହିତ ଜିଲ୍ଲା ପ୍ରଶାସନର ଉଦ୍ୟମକୁ ପ୍ରଶଂସା କରିଥିଲେ । ପରେ ଶ୍ରୀପାଣ୍ଡିଆନ ସଡକପଥରେ ହରଭଙ୍ଗା ବ୍ଲକକୁ ଗସ୍ତ କରି ରାସ୍ତାରେ ବାମଣ୍ଡା ନିକଟସ୍ଥ ଆଦର୍ଶ ଡିଗ୍ରୀ ମହାବିଦ୍ୟାଳୟରେ ପହଞ୍ଚି ଛାତ୍ରଛାତୀମାନଙ୍କ ସହିତ ଆଲୋଚନା କରିଥିଲେ ।
ସେଠାରୁ ୫ ଟି ବିଦ୍ୟାଳୟ ବଡବନ୍ଧ କନ୍ୟାଶ୍ରମ ବୁଲିଦେଖିବା ସହିତ ଛାତ୍ରୀମାନଙ୍କ ସହିତ ଆଲୋଚନା କରିଥିଲେ । ପରେ ପରେ ପୁରଣାକଟକର ଅଧିଷ୍ଠାତ୍ରୀ ଦେବୀ ଭୈରବୀ ମନ୍ଦିରରେ ପହଞ୍ଚି ପୂଜାର୍ଚ୍ଚନା କରିବାପରେ ମନ୍ଦିର ଉନ୍ନୟନ ପ୍ରକଳ୍ପ ସଂପର୍କରେ ସମୀକ୍ଷା କରିଥିଲେ । ସେଠାରୁ ଭୈରବୀ ମିନିଷ୍ଟାଡିୟମ ଠାରେ ଆୟୋଜିତ ଅଭିଯୋଗ ଶୁଣାଣି କାର୍ଯ୍ୟକ୍ରମରେ ଯୋଗଦେଇ ସିଧାସଳଖ ସାଧାରଣଲୋକଙ୍କ ଅଭିଯୋଗ ଶୁଣିବା ସହ ତହାର ତୁରନ୍ତ ସମାଧାନ ପାଇଁ ନିର୍ଦ୍ଦେଶ ଦେଇଥିଲେ ।
ମହାନଦୀ ପଠାରୁ ମୃତ ଦେହ ଉଦ୍ଧାର:ପଥର ଛେଚି ଓ କାଚ ବୋତଲ ଦ୍ୱାରା ହତ୍ୟା
ବୌଦ୍ଧ,୬/୭: ବୌଦ୍ଧ ସହରର ସତସଙ୍ଗ ବିହାର ପଛପଟେ ମହାନଦୀ ପଠାରୁ ଜଣେ ବ୍ୟକ୍ତିର ମୃତ ଦେହ ଉଦ୍ଧାର ହୋଇଛି । ମିଳିଥିବା ସୁଚନା ମୁତାବକ ବୌଦ୍ଧ ଜିଲ୍ଲା ସାନବଙ୍କାପଡା ଗ୍ରାମର ଖତୁ ବାଘ ( ୬୨) ଦୀର୍ଘ ୫/୬ ବର୍ଷ ଘରୁ ପଳାଇଆସି ବୌଦ୍ଧ ସହରରେ ବିଭିନ୍ନ ସ୍ଥାନରେ ବୁଲି ବୁଲି ବୋତଲ ସଂଗ୍ରହ କରି ଚଳିଆସୁଥିଲା । କିନ୍ତୁ ମଙ୍ଗଳବାର ସକାଳେ ଖତୁ ବାଘର ମୃତ ଦେହ ରକ୍ତ ଜୁଡୁ ବୁଡୁ ଅବସ୍ଥାରେ ମହାନଦୀ ପଠାରେ ପଡିଥିବା ଲୋକମାନେ ଦେଖିବାକୁ ପାଇଥିଲେ ।
ମୃତ ଦେହ ପାଖରେ ଏକ ସାଇକେଲ ପଡିଥିବ ଦେଖିବାକୁ ମିଳିଛି । ଖବର ପାଇ ବୌଦ୍ଧ ପୁଲିସ ଘଟଣା ସ୍ଥଳରେ ପହଞ୍ôଚ ଶବକୁ ଜବତ କରିବା ସହ ପୋଷ୍ଟମର୍ଟମ ପାଇ ବୌଦ୍ଧ ମେଡିକାଲକୁ ପଠାଇଥିଲା । ଏନେଇ ବୌଦ୍ଧ ଥାନା ଅଧିକାରୀ ମାଧବାନନ୍ଦ ନାଏକଙ୍କୁ ପଚାରିବାରୁ ଖତୁ ବାଘ ବୋତଲ ସଂଗ୍ରହ କରି ଚଳିଆସୁଥିଲା । ତାକୁ ପଥର ଛେଚି ଓ କାଚ ବୋତଲ ଦ୍ୱାରା ମାଡ ମାରି ହତ୍ୟା କରାଯାଇଥିବା ସୁଚନା ଦେଇଥିଲେ । ଏନେଇ ଏକ ମାମଲା ରୁଜୁ ହୋଇଛି , ତଦନ୍ତ ଚାଲିଛି ତୁରନ୍ତ ଅଭିଯୁକ୍ତ ମାନଙ୍କୁ ଗିରଫ କରାଯିବ ବୋଲି ପ୍ରକାଶ କରିଥିଲେ ।
ବୌଦ୍ଧ :୫ଟି ସଚିବଙ୍କ ଗସ୍ତକୁ ବିରୋଧ
ବୌଦ୍ଧ,୬/୭: ୫ଟି ସଚିବଙ୍କ ଗସ୍ତକୁ ଜିଲ୍ଲାର ବିଭିନ୍ନ ବିରୋଧି ଦଳ ପକ୍ଷରୁ ବିରୋଧ କରାଯାଇଛି । ଜିଲ୍ଲାର କଂଟାମାଳ ବ୍ଲକ ଆମ୍ବଗାଁ ସମାବେଶରେ ଯୋଗଦେବାକୁ ସଚିବ ଯାଉଥିବାବେଳେ ବିଜେପି ପକ୍ଷରୁ କଳାପତାକା ଦେଖାଇ ବିରୋଧ କରାଯିବାସହ ନାରାବାଜି କରିଥିଲେ । ସେହିପରି ବୌଦ୍ଧ ମ୍ୟୁଜିୟମ ସମ୍ମୁଖରେ ସଚିବଙ୍କ ଗସ୍ତକୁ ଜିଲ୍ଲା କଂଗ୍ରେସ ପକ୍ଷରୁ କଳାପତାକା ଦେଖାଇ ବିରୋଧ ନାରାବାଜି କରିବା ଯୋଗୁଁ ପୋଲିସ ପକ୍ଷରୁ କର୍ମିଙ୍କୁ ଗିରଫ କରାଯାଇଥିଲା । ସେହିପରି ଷ୍ଟାଡିୟମ ସାମନାରେ ସଚିବଙ୍କ ଗାଡିକୁ ଅଣ୍ଡାମାଡ କରାଯାଇଥିଲା ।
ବୌଦ୍ଧ : ସଚିବଙ୍କ ଗସ୍ତ ପୁର୍ବରୁ ସହରରେ ଅଣ୍ଡା ଦୋକାନ ବନ୍ଦ କରାଗଲା
ବୌଦ୍ଧ,୬/୭ : ୫ଟି ସଚିବ ବୌଦ୍ଧ ଗସ୍ତ ପୁର୍ବରୁ ବିରୋଧିଙ୍କ ଅଣ୍ଡାମାଡ ଘଟଣାକୁ ଦୃଷ୍ଟିରେ ରଖି ସହରରେ ସମସ୍ତ ଅଣ୍ଡା ଦୋକାନକୁ ପୋଲିସ ପକ୍ଷରୁ ବନ୍ଦ କରାଯାଇଥିଲା ଫଳରେ ଦୋକାନିଙ୍କ ମଧ୍ୟରେ ଅସନ୍ତୋଷ ଦେଖାଯାଇଥିଲା ।
ବୌଦ୍ଧ : ମହିଳାଙ୍କୁ ବୁହାଗଲା କିନ୍ତୁ ଖାଦ୍ୟ ପାନିୟ ଦିଆଗଲା ନାହିଁ
ବୌଦ୍ଧ,୬/୭ : ସଚିବଙ୍କ ଗସ୍ତରେ ବୌଦ୍ଧ ଷ୍ଟାଡିୟମ ଠାରେ ମହିଳା ସମାବେଶ ରେ ଯୋଗଦେବା ପାଇଁ ବିଭିନ୍ନ ଗ୍ରାମରୁ ମହିଳା ମାନଙ୍କୁ ବୌଦ୍ଧ ବସରେ ବୁହାଯାଇଥିଲ।। ସେଥିପାଇଁ ଆଜି ବୌଦ୍ଧରୁ ସବୁ ରୁଟକୁ ଘରୋଇ ବସ୍ ଚଳାଚଳ ଅପରାହ୍ନ ପର୍ଯ୍ୟନ୍ତ ବନ୍ଦ ରହିଥିଲା ।
ତେବେ ହଜାର ହଜାର ମହିଳା ସମାବେଶରେ ଯୋଗ ଦେଇଥିଲେ ମଧ୍ୟ କାର୍ଯ୍ୟକ୍ରମ ପୁର୍ବରୁ କିମ୍ବା ପରେ ତାଙ୍କୁ ଖାଇବା ତ ଦୁରର କଥା ପାଣି ଟୋପାଏ ମଧ୍ୟ ଯୋଗାଇବା ବ୍ୟବସ୍ଥା ନଥିବାରୁ ମହିଳାଙ୍କ ମଧ୍ୟରେ ଘୋର ଅସନ୍ତୋଷ ଦେଖା ଯାଇଥିଲା ।
ସମାବେଶ ସଫଳ ପାଇଁ ଯୋଜନା ଅନେକ ଫଳ ଶୁନ
ଆଜିର ସମାବେଶକୁ ସଫଳ କରାଇବା ପାଇଁ ପ୍ରଶାସନ ଓ ଦଳ ପକ୍ଷରୁ ବିଭିନ୍ନ ସ୍ଥାନରେ ଯୋଜନା ମୁତାବକ ଜନସମାବେଶ ପ୍ରସ୍ତୁତ କରାଯାଇଥିଲା ସିନା କିନ୍ତୁ ଦାବିପତ୍ର ଗ୍ରହଣ କରି ସବୁ ବର୍ଗର ସମାବେଶ ସ୍ୱଳ୍ପ ସମୟରେ ଶେଷ କରି ଚାଲି ଯାଇଥିଲେ । ତେବେ ଏହି କାର୍ଯ୍ୟକ୍ରମ ସଫଳ କରିବା ପାଇଁ ଏତେ ଅର୍ଥ ବ୍ୟୟକରି ଯୋଜନା ସିନା ଅନେକ କରାଯାଇଥିଲା କିନ୍ତୁ ଏହାର ଫଳ ଶୁନ ବୋଲି ବୁଦ୍ଧିଜୀବୀରେ ପ୍ରତିକ୍ରିୟା ପ୍ରକାଶ ପାଇଥିଲା ।
ଏମିତି ବେଳେ ବେଳେ ସଚିବ ଆସନ୍ତେ କି
୫ଟି ସଚିବଙ୍କ ବୌଦ୍ଧ ଜିଲ୍ଲା ଗସ୍ତ କାର୍ଯ୍ୟକ୍ରମ ସ୍ଥିର ହେବାପରେ ଜିଲ୍ଲାରେ ପ୍ରସାଶନ ଓ ଦଳିୟ କର୍ମିଙ୍କ ତତ୍ପରତା ଦେଖା ଯାଇଥିଲା । ସଚିବ ପରିଦର୍ଶନ ସ୍ଥାନ ଏକ ନୂତନ ରୂପ ନେଇଥିଲା । ସଫାସୁତରା ରାସ୍ତା ଘାଟ, ଡାକ୍ତର ଖାନା, ସ୍କୁଲ କଲେଜ ରଖାଯାଇଥିଲା । ସତେ ଯେମିତି ପ୍ରଧାନମନ୍ତ୍ରୀ ଗସ୍ତ କରୁଛନ୍ତି । ଜଣେ ସଚିବଙ୍କ ଗସ୍ତରେ ଏତେ ସାଜସଜା ଦେଖି ସଚିବ ଏମିତି ବେଳେ ବେଳେ ବୁଲି ଆସନ୍ତେ କି ବୋଲି ସାଧାରଣରେ ପ୍ରତିକ୍ରିୟା ପ୍ରକାଶ ପାଇଥିଲା ।
