ନାଏବ ସରପଞ୍ଚ ରଞ୍ଜିତା ତ୍ରିପାଠୀଙ୍କ ସନ୍ଦେହଜନକ ମୃତ୍ୟୁ, ଆତ୍ମହତ୍ୟା ନା ହତ୍ୟା କାରଣ ଅସ୍ପଷ୍ଟ
ରାୟଗଡ଼ା, ୧୨/୯ : ରାୟଗଡ଼ା ଜିଲ୍ଲା ଗୁଣପୁର ଥାନା ଅନ୍ତର୍ଗତ ଡମ୍ବସରା ଗ୍ରାମର ଜଣେ ମହିଳା ନାଏବ ସରପଞ୍ଚଙ୍କ ସନ୍ଦେହ ଜନକ ମୃତ୍ୟୁ ହୋଇଛି । ମୃତ ନାଏବ ସରପଞ୍ଚ ହେଲେ ନରସିଂହ ତ୍ରିପାଠୀଙ୍କ ପତ୍ନୀ ରଞ୍ଜିତା ତ୍ରିପାଠୀ । ପରିବାର ପକ୍ଷରୁ ଗୁଣପୁର ଥାନାରେ ଲିଖିତ ଅଭିଯୋଗ କରାଯାଇଛି । ପୋଲିସ ପ୍ରାଥମିକ ତଦନ୍ତ ପ୍ରକ୍ରିୟା ଆରମ୍ଭ କରିଛି ।
ପ୍ରାପ୍ତ ସୂଚନା ମୁତାବକ, ୨୦୦୭ ରେ ରଂଜିତା ଓ ନରସିଂହ ତ୍ରିପାଠୀଙ୍କ ମଧ୍ୟରେ ବିବାହ ହୋଇଥିଲା । ସେ ନାଏବ ସରପଞ୍ଚ ମଧ୍ୟ ଥିଲେ । ଗତକାଲି ହଠାତ ରଂଜିତାଙ୍କ ମୃତ୍ୟୁ ହୋଇଥିବା ଜଣାପଡ଼ିଥିଲେ । ପରିବାର ଲୋକେ ତାଙ୍କୁ ଉଦ୍ଧାର କରି ଗୁଣପୁର ଉପଖଣ୍ଡ ଚିକିତ୍ସାଳୟରେ ଭର୍ତ୍ତି କରିଥିଲେ ।
ମାତ୍ର ଡାକ୍ତର ତାଙ୍କୁ ମୃତ ଘୋଷଣା କରିଥିଲେ । ଏ ନେଇ ପରିବାର ପକ୍ଷରୁ ଥାନାରେ ଅଭିଯୋଗ କରାଯିବା ପରେ ପୋଲିସ ମୃତ ଦେହକୁ ଜବତ କରିବା ସହିତ ବ୍ୟବଚ୍ଛେଦ ପାଇଁ ପଠାଇ ଦେଇଛି । କିପରି ତାଙ୍କର ମୃତ୍ୟୁ ହେଲା ଜଣାପଡ଼ି ନାହିଁ । ଉପଯୁକ୍ତ ତଦନ୍ତ କରିବାକୁ ପରିବାର ଦାବି କରିଛି । ପୋଲିସ ତଦନ୍ତ ଆରମ୍ଭ କରିଛି ।
