ଜିଲ୍ଲା ମୁଖ୍ୟ ଚିକିତ୍ସାଳୟରେ ରୋଗୀ କଲ୍ୟାଣ ସମିତିର କାର୍ଯ୍ୟ ନିର୍ବାହୀ ସଭା ଅନୁଷ୍ଠିତ
କମ୍ଭୁଧର କ୍ଷେତିଙ୍କ ରିପୋର୍ଟ
ବୌଦ୍ଧ, ୨୫/୨ : (ମଙ୍ଗଳବାର) ପୂର୍ବାହ୍ନରେ ଜ଼ିଲ୍ଲା ମୁଖ୍ୟ ଚିକିତ୍ସାଳୟ ତାଲିମ କେନ୍ଦ୍ରଠାରେ ଜିଲ୍ଲାପାଳ ବିଭୁତି ଭୂଷଣ ନାୟକଙ୍କ ଅଧ୍ୟକ୍ଷତାରେ ଏକ ଉଚ୍ଚସ୍ତରୀୟ ବୈଠକ ଅନୁଷ୍ଠିତ ହୋଇଯାଇଛି ।
ପ୍ରାରମ୍ଭରେ ଜିଲ୍ଲା ମୁଖ୍ୟ ଚିକିତ୍ସା ଅଧିକାରୀ ଡ଼.ମହେନ୍ଦ୍ର କୁମାର ସାହୁ ସମସ୍ତଙ୍କୁ ସ୍ବାଗତ ଜଣାଇବା ପରେ ଅତିରିକ୍ତ ଜିଲ୍ଲା ଚିକିତ୍ସାଧିକାରୀ ଡ଼.ସଂଘମିତ୍ରା ପଣ୍ଡା ବୈଠକରେ ସମସ୍ତ ବିଷୟରେ ପୁଙ୍ଖାନୁପୁଙ୍ଖ ଆଲୋଚନା କରିଥିଲେ । ଗତ ବୈଠକ ରେ ନିଆଯାଇଥିବା ବିଭିନ୍ନ ପ୍ରସ୍ତାବ ଉପରେ ଆଲୋଚନା ହୋଇଥିଲା ।
ଡାକ୍ତରଖାନା ପରିସରରେ ଜବରଦଖଲ ଉଚ୍ଛେଦ, ଡ୍ରେନେଜ୍ ବ୍ୟବସ୍ଥା ଓ ମରାମତି ବିଷୟ ଖୁବ୍ ଶୀଘ୍ର କରିବାକୁ ବିଭାଗୀୟ ଅଧିକାରୀଙ୍କୁ ନିର୍ଦ୍ଦେଶ ଦିଆଗଲା ।
ରୋଗୀମାନଙ୍କ ପାଇଁ ଆମ୍ବୁଲାନ୍ସ ବ୍ୟବସ୍ଥା ଅଧିକ ଯୋଗାଇ ଦେବାକୁ ପ୍ରସ୍ତାବ ଗ୍ରହଣ କରାଯାଇଛି । ନୂତନ ଭାବେ ନିର୍ମାଣ ହୋଇଥିବା ୩୦୦ ଶଯ୍ୟା ବିଶିଷ୍ଟ ଚିକିତ୍ସାଳୟ ରେ ରହିଥିବା ସମସ୍ୟା ଓ ସମାଧାନ ବିଷୟରେ ସମୀକ୍ଷା ହୋଇଥିଲା ।
କୋଠା ନିର୍ମାଣ ମଞ୍ଜୁରୀ, ପରିବେଶ ଅନୁମୋଦନ ପତ୍ର, ଅଗ୍ନି ନିରାପତ୍ତା ପ୍ରମାଣପତ୍ର ଓ ପରିଚାଳନା ପ୍ରମାଣପତ୍ର ହୋଇ ନ ଥିବା ଜଣାପଡ଼ିଛି ।
ଜିଲ୍ଲାପାଳ ଖୁବ୍ ଶୀଘ୍ର କରିବାକୁ ନିର୍ଦ୍ଦେଶ ଦେବା ସହିତ ଆସନ୍ତା ମାର୍ଚ୍ଚ ମାସରେ ଉଦ୍ଘାଟନ କରାଯିବ ବୋଲି ପ୍ରକାଶ କରିଥିଲେ । ଫିଜିଓଥେରାପିର ଆବଶ୍ୟକତାକୁ ଦେଖି ନୂତନ ଯନ୍ତ୍ରପାତୀ ବ୍ୟବସ୍ଥା ଏବା ରକ୍ତ ଭଣ୍ଡାରରେ ଆବଶ୍ୟକ ପଡ଼ୁଥିବା ସାମଗ୍ରୀ କିଣିବାକୁ ଅନୁମୋଦନ ହୋଇଥିଲା ।
ବୈଠକରେ ବିଭାଗୀୟ ସମସ୍ତ ଅଧିକାରୀ, କାର୍ୟ୍ୟକାରୀ ସଦସ୍ୟ ତାରେଣି ମହାପାତ୍ର, ଦେବାଶିଷ ପୁରୋହିତ, ନଟବର ଅଗ୍ରୱାଲା, ଆଶାରାଣୀ ମିଶ୍ର ଉପସ୍ଥିତ ରହି ଆଲୋଚନା ରେ ଅଂଶଗ୍ରହଣ କରିଥିଲେ ।
ଟିବି ମୁକ୍ତ ଭାରତ ଅଭିଯାନ କାର୍ଯ୍ୟକ୍ରମ ବିଷୟରେ ମଧ୍ୟ ବୈଠକ ରେ ଆଲୋଚନା ହୋଇଥିଲା । ଜିଲ୍ଳା ଲେପ୍ରୋସି କଲୋନୀ ରେ ରୋଗୀ ନ ଥିବା ଡ଼ାକ୍ତର ପଣ୍ଡା ପ୍ରକାଶ କରିଥିଲେ । କଣ୍ଟାମାଳ ବିଧାୟକ ପ୍ରତିନିଧି ଇଂ ରାକେଶ ତ୍ରିପାଠୀ, ସିଡିପିଓ ପ୍ରମୁଖ ଯୋଗଦାନ କରିଥିଲେ ।
