ସୁରକ୍ଷିତ, ଶାନ୍ତିପୂର୍ଣ୍ଣ ଓ ପରିବେଶମିତ୍ର ଗଣେଶ ପୂଜା ପାଇଁ କେନ୍ଦ୍ରାଞ୍ଚଳ ଆଇଜିଙ୍କ ଆହ୍ୱାନ
ଆଇଜି ଡ. ସତ୍ୟଜିତ ନାୟକ, ଆଇପିଏସ୍
କଟକ, ୧୫/୯ : ଆଗାମୀ ଗଣେଶ ପୂଜାକୁ ଶାନ୍ତିପୂର୍ଣ୍ଣ, ସୁରକ୍ଷିତ ଓ ପରିବେଶମିତ୍ର ଭାବେ ପାଳନ କରିବାକୁ କେନ୍ଦ୍ରାଞ୍ଚଳ ଆଇଜି ଡ. ସତ୍ୟଜିତ ନାୟକ, ଆଇପିଏସ୍ ଜନସାଧାରଣ, ପୂଜା କମିଟି, ସ୍ୱେଚ୍ଛାସେବୀ ଓ ସମସ୍ତ ସମ୍ପ୍ରଦାୟର ନେତୃବୃନ୍ଦଙ୍କୁ ଆହ୍ୱାନ ଦେଇଛନ୍ତି।
ଗଣେଶ ପୂଜା କେବଳ ଏକ ଧାର୍ମିକ ଉତ୍ସବ ନୁହେଁ, ଏହା ଭାଇଚାରା, ସାମ୍ପ୍ରଦାୟିକ ସଦ୍ଭାବ ଓ ପରସ୍ପର ସମ୍ମାନର ବାର୍ତ୍ତା ବହନ କରେ ବୋଲି ଡ. ନାୟକ କହିଛନ୍ତି।
ପୂଜା ସମୟରେ ଗୁଜବ, ଉତ୍ତେଜନାମୂଳକ ବାର୍ତ୍ତା, ଅପପ୍ରଚାର ଓ ସାମାଜିକ ଗଣମାଧ୍ୟମରେ ଅସତ୍ୟ ତଥ୍ୟ ପ୍ରସାରଣରୁ ଦୂରେଇ ରହିବାକୁ ସେ ଅନୁରୋଧ କରିଛନ୍ତି।
ସୁରକ୍ଷିତ ଭସାଣି ଉପରେ ଗୁରୁତ୍ୱ
ଗଣେଶ ମୂର୍ତ୍ତି ଭସାଣି ସମୟରେ ସୁରକ୍ଷାକୁ ସର୍ବାଧିକ ପ୍ରାଥମିକତା ଦେବାକୁ ଆଇଜି ଆହ୍ୱାନ ଦେଇଛନ୍ତି।
ନିର୍ଦ୍ଧାରିତ ଓ ସୁରକ୍ଷିତ ସ୍ଥାନରେ ହିଁ ମୂର୍ତ୍ତି ଭସାଣି କରିବା ସହ ଗଭୀର ଜଳକୁ ନଯିବା ପାଇଁ ସେ ପରାମର୍ଶ ଦେଇଛନ୍ତି। ଭସାଣି ସମୟରେ ଶିଶୁ ଓ ବୟସ୍କଙ୍କ ପ୍ରତି ବିଶେଷ ସତର୍କତା ଅବଲମ୍ବନ କରିବାକୁ କୁହାଯାଇଛି।
ପୂଜା କମିଟି ଓ ସ୍ୱେଚ୍ଛାସେବୀମାନେ ଭିଡ଼, ଟ୍ରାଫିକ୍ ଓ ଶୋଭାଯାତ୍ରା ପରିଚାଳନାରେ ପୁଲିସ ଓ ପ୍ରଶାସନକୁ ସହଯୋଗ କରିବାକୁ ଆଇଜି ଅନୁରୋଧ କରିଛନ୍ତି।
ପରିବେଶମିତ୍ର ଗଣେଶ ପୂଜା ପରିବେଶ ସୁରକ୍ଷା ଦିଗରେ ମଧ୍ୟ ସଚେତନ ହେବାକୁ ଡ. ନାୟକ ଆହ୍ୱାନ ଦେଇଛନ୍ତି। ପ୍ରାକୃତିକ ମାଟିରେ ନିର୍ମିତ ପରିବେଶମିତ୍ର ମୂର୍ତ୍ତି ବ୍ୟବହାର କରିବା, ପ୍ଲାଷ୍ଟିକ୍ ଓ ପରିବେଶ ପ୍ରଦୂଷଣକାରୀ ସାମଗ୍ରୀର ବ୍ୟବହାର କମାଇବା ଏବଂ ଭସାଣି ପରେ ଆବର୍ଜନାର ସଠିକ୍ ପରିଚାଳନା କରିବାକୁ ସେ ପରାମର୍ଶ ଦେଇଛନ୍ତି।
ଏଥିସହ ଅତ୍ୟଧିକ ଶବ୍ଦ ପ୍ରଦୂଷଣ ଓ ଅନାବଶ୍ୟକ ବାଣ ଫୁଟାଇବାରୁ ବିରତ ରହି ନିର୍ଦ୍ଧାରିତ ନିୟମ ଓ ସମୟସୀମା ପାଳନ କରିବାକୁ ପୂଜା କମିଟିଗୁଡ଼ିକୁ କୁହାଯାଇଛି।
ଯୁବପିଢ଼ିଙ୍କୁ ସ୍ୱଚ୍ଛତା ଅଭିଯାନ, ଟ୍ରାଫିକ୍ ସଚେତନତା, ଭିଡ଼ ନିୟନ୍ତ୍ରଣ ଓ ପରିବେଶ ସୁରକ୍ଷା କାର୍ୟ୍ୟକ୍ରମରେ ସାମିଲ ହେବାକୁ ଡ. ନାୟକ ଆହ୍ୱାନ ଦେଇଛନ୍ତି।
“ସୁରକ୍ଷିତ ପୂଜା, ସୁରକ୍ଷିତ ଭସାଣି, ଦୃଢ଼ ସାମ୍ପ୍ରଦାୟିକ ସଦ୍ଭାବ ଓ ସବୁଜ-ସ୍ୱଚ୍ଛ ପରିବେଶ—ଏହା ହିଁ ହେଉ ଗଣେଶ ପୂଜାର ବାର୍ତ୍ତା,” ବୋଲି କେନ୍ଦ୍ରାଞ୍ଚଳ ଆଇଜି କହିଛନ୍ତି।
