କୁରାଡ଼ମଲ୍ଲ କ୍ଲଷ୍ଟରର ପ୍ରଥମ ମାସିକ ବୈଠକ ;ଗ୍ୟାଲେରୀ ଓ ଯୋଡ଼ି କାର୍ଯ୍ୟକୁ ଗୁରୁତ୍ୱ
ପ୍ରସନ୍ନ କୁମାର ପାଇକରାୟଙ୍କ ରିପୋର୍ଟ
ଖୋରଧା, ୪/୭: ମୌଳିକ ସ୍ୱାକ୍ଷରତା ଓ ସଂଖ୍ୟାଜ୍ଞାନ (ଏଫ.ଏଲ.ଏନ.) କାର୍ଯ୍ୟକ୍ରମକୁ ଅଧିକ ଫଳପ୍ରଦ କରିବା ଲକ୍ଷ୍ୟରେ କୁରାଢ଼ମଲ୍ଲ କ୍ଲଷ୍ଟରର ପ୍ରଥମ ମାସିକ କ୍ଲଷ୍ଟର ସ୍ତରୀୟ ବୈଠକ ଶନିବାର ସରକାରୀ ଉଚ୍ଚ ପ୍ରାଥମିକ ବିଦ୍ୟାଳୟ, ଦଳେଇପୁଟଠାରେ ଅନୁଷ୍ଠିତ ହୋଇଛି।
ରାଜ୍ୟ ପ୍ରକଳ୍ପ ନିର୍ଦ୍ଦେଶକଙ୍କ ଚିଠି ସଂଖ୍ୟା–୭୨୩୩, ତାରିଖ ୧ ଜୁଲାଇ ୨୦୨୬ ଅନୁଯାୟୀ ଆୟୋଜିତ ଏହି ବୈଠକରେ କ୍ଲଷ୍ଟର ଅନ୍ତର୍ଗତ ୧୦ଟି ବିଦ୍ୟାଳୟର ପ୍ରଧାନ ଶିକ୍ଷକ, ଶିକ୍ଷୟିତ୍ରୀ ଓ ଏଫ.ଏଲ.ଏନ. ଶିକ୍ଷକ-ଶିକ୍ଷୟିତ୍ରୀମାନେ ଯୋଗଦେଇଥିଲେ। କୁରାଢମଲ୍ଲ ସରକାରୀ ଉଚ୍ଚ ବିଦ୍ୟାଳୟର ପ୍ରଧାନ ଶିକ୍ଷୟିତ୍ରୀ ପ୍ରଭାସିନୀ ଦାସ ଏବଂ ଦଳେଇପୁଟ ସରକାରୀ ଉଚ୍ଚ ପ୍ରାଥମିକ ବିଦ୍ୟାଳୟର ଭାରପ୍ରାପ୍ତ ପ୍ରଧାନ ଶିକ୍ଷୟିତ୍ରୀ ମଞ୍ଜୁଲତା ପଣ୍ଡା ବୈଠକର ଶୁଭାରମ୍ଭ କରିଥିଲେ। ନୂତନ ଶିକ୍ଷାବର୍ଷରେ ଶିକ୍ଷାର ଗୁଣାତ୍ମକ ଉନ୍ନତି ପାଇଁ ଶିକ୍ଷକ ମାନଙ୍କ ଭୂମିକା ସମ୍ପର୍କରେ ସେମାନେ ଆଲୋକପାତ କରିଥିଲେ।
ବୈଠକରେ ଚଳିତ ଶିକ୍ଷାବର୍ଷର ବାର୍ଷିକ କାର୍ଯ୍ୟ ଯୋଜନା, ବିଦ୍ୟାଳୟ ସମୟ ନିର୍ଘଣ୍ଟ, ଶିକ୍ଷଣ ଫଳାଫଳ ପୁସ୍ତିକା, ଶୈକ୍ଷିକ କ୍ୟାଲେଣ୍ଡର, ଯାଦୁପେଡ଼ି, ଶିକ୍ଷଣ ସୋପାନ ରେଜିଷ୍ଟର, ପରୀକ୍ଷା ଓ ମୂଲ୍ୟାୟନର ରୂପରେଖା ଆଦି ବିଷୟରେ ବିସ୍ତୃତ ଆଲୋଚନା କରାଯାଇଥିଲା।
ବିଶେଷକରି ଶ୍ରେଣୀଗୃହ ଶିକ୍ଷଣକୁ ଅଧିକ ଆକର୍ଷଣୀୟ ଓ ଶିଶୁକୈନ୍ଦ୍ରିକ କରିବା ପାଇଁ \’ଗ୍ୟାଲେରୀ କାର୍ଯ୍ୟ ଏବଂ \’ଯୋଡ଼ି କାର୍ଯ୍ୟର ପ୍ରଭାବଶାଳୀ ପ୍ରୟୋଗ ଉପରେ ଗୁରୁତ୍ୱ ଦିଆଯାଇଥିଲା।
ପ୍ରଶିକ୍ଷଣରେ ଯାଦୁପେଡ଼ି ସାମଗ୍ରୀ ବ୍ୟବହାର କରି ଶିକ୍ଷକ-ଶିକ୍ଷୟିତ୍ରୀ ମାନେ ବିଭିନ୍ନ ଶିକ୍ଷଣ କୌଶଳର ବ୍ୟବହାରିକ ପ୍ରଦର୍ଶନ କରିଥିଲେ।
ଏହା ମାଧ୍ୟମରେ ଶିଶୁମାନଙ୍କ ଶିକ୍ଷଣକୁ କିପରି ସହଜ, ଆନନ୍ଦଦାୟକ ଓ ଫଳପ୍ରଦ କରାଯାଇପାରିବ, ସେ ନେଇ ମତବିନିମୟ ହୋଇଥିଲା।
ଉପସ୍ଥିତ ଶିକ୍ଷକମାନେ ପରସ୍ପରର ଅଭିଜ୍ଞତା ବାଣ୍ଟିବା ସହ ନୂତନ ଶିକ୍ଷଣ ପଦ୍ଧତି ଅବଲମ୍ବନ କରିବାକୁ ମତ ପ୍ରକାଶ କରିଥିଲେ।
ଆଞ୍ଚଳିକ ସାଧନ କେନ୍ଦ୍ର ସଂଯୋଜକ ମନୋଜ ଦାଶ ଓ ସମ୍ବଳ ଶିକ୍ଷକ ରବିନାରାୟଣ ସାହୁ ପ୍ରଶିକ୍ଷଣକୁ ପରିଚାଳନା କରିଥିଲେ। ବିଦ୍ୟାଳୟର ଶିକ୍ଷୟିତ୍ରୀ ମଧୁସ୍ମିତା ଦାସ, ପ୍ରିୟଦର୍ଶିନୀ ନନ୍ଦ, ଗୀତାଞ୍ଜଳି ପରିଡ଼ା, ଅମୃତା ମହାନ୍ତି ଓ ସଂଯୁକ୍ତା ବେହେରା କାର୍ଯ୍ୟକ୍ରମ ପରିଚାଳନାରେ ସହଯୋଗ କରିଥିଲେ।
ପରିଶେଷରେ ଶିକ୍ଷକ ଯୁଧିଷ୍ଠିର ସାହୁ ଧନ୍ୟବାଦ ଅର୍ପଣ କରିଥିଲେ। ବକ୍ତାମାନେ କହିଥିଲେ ଯେ, ମାସିକ କ୍ଲଷ୍ଟର ବୈଠକ କେବଳ ପ୍ରଶାସନିକ ସମୀକ୍ଷାରେ ସୀମିତ ନ ରହି ଶିକ୍ଷକ ମାନଙ୍କ ମଧ୍ୟରେ ଅଭିଜ୍ଞତା ବିନିମୟ, ଅଭିନବ ଶିକ୍ଷଣ କୌଶଳର ପ୍ରସାର ଏବଂ ଶ୍ରେଣୀଗୃହ ଶିକ୍ଷାର ମାନୋନ୍ନତି ପାଇଁ ଏକ ପ୍ରଭାବଶାଳୀ ମଞ୍ଚରେ ପରିଣତ ହୋଇଛି।
ଏହାର ସୁଫଳ ସିଧାସଳଖ ଭାବେ ଛାତ୍ରଛାତ୍ରୀଙ୍କ ଶିକ୍ଷଣ ଦକ୍ଷତା ବୃଦ୍ଧିରେ ପ୍ରତିଫଳିତ ହେବ ବୋଲି ଆଶା ପ୍ରକାଶ ପାଇଥିଲା।
ଏହି ରିପୋର୍ଟଟି \’ସମାଜ\’ ଦୈନିକର ଭାଷା, ଉପସ୍ଥାପନା ଓ ସମ୍ବାଦ ଶୈଳୀକୁ ଧ୍ୟାନରେ ରଖି ସମ୍ପାଦିତ କରାଯାଇଛି।
