ନୂଆପଡ଼ାରେ ନବୀନ ପଟ୍ଟନାୟକଙ୍କ ହେଲିକପ୍ଟର ଯାଞ୍ଚ କରିଥିଲେ ଫ୍ଲାଇଂ ସ୍କ୍ବାଡ୍
ନୂଆପଡ଼ା ୪/୧୧: ନୂଆପଡ଼ାରେ ଯାଞ୍ଚ ହୋଇଥିଲା ବିଜେଡି ସୁପ୍ରିମୋ ତଥା ବିରୋଧୀ ଦଳ ନେତା ନବୀନ ପଟ୍ଟନାୟକଙ୍କ ବିମାନ । ନବୀନଙ୍କ ବିମାନ ଏବଂ ହେଲିକପ୍ଟରକୁ ଯାଞ୍ଚ କରିଥିଲେ ନିର୍ବାଚନ କମିଶନ ।
ଆଦର୍ଶ ଆଚରଣବିଧି ଅନୁସାରେ ବିମାନ ଏବଂ ହେଲିକପ୍ଟର ଯାଞ୍ଚ ହୋଇଥିବା ସୂଚନା ମିଳିଛି । ନୂଆପଡ଼ା ଉପନିର୍ବାଚନ ପ୍ରଚାରରେ ସାମିଲ ହେବାକୁ ଯାଇଥିବା ବେଳେ ନିର୍ବାଚନ ଆଚରଣବିଧି ଅଧାରରେ ଅନୁଧ୍ୟାନ କରିଥିଲେ ଅଧିକାରୀ । ଏ ନେଇ ନୂଆପଡ଼ା ଜିଲ୍ଲାପାଳ ମଧ୍ୟ ‘ଏକ୍ସ’ରେ ସ୍ପଷ୍ଟ କରିଛନ୍ତି ।
ସୂଚନାଯୋଗ୍ୟ ଯେ, ନୂଆପଡ଼ା ଉପନିର୍ବାଚନରେ ବିଜେଡି ପ୍ରାର୍ଥୀ ସ୍ନେହାଙ୍ଗିନୀ ଛୁରିଆଙ୍କ ପାଇଁ ପ୍ରଚାର କରିବାକୁ ସୋମବାର ନୂଆପଡ଼ା କୋମନା ଯାଇଥିଲେ । ସେହି ସମୟରେ ନିର୍ବାଚନ ଅଧିକାରୀଙ୍କ ଦ୍ବାରା ନବୀନଙ୍କ ବିମାନ ଯାଞ୍ଚ କରାଯାଇଥିଲା । ଭୁବନେଶ୍ବରରୁ ନୂଆପଡ଼ା ଏକ ସ୍ବତନ୍ତ୍ର ବିମାନରେ ଯାଇଥିଲେ ନବୀନ ପଟ୍ଟନାୟକ । ସେଠାରେ ପହଞ୍ଚିବା ପରେ ବିଜେଡି ସୁପ୍ରିମୋଙ୍କ ବିମାନରେ ଥିବା ଲଗେଜ୍କୁ ତନତନ କରି ଅଧିକାରୀମାନେ ଯାଞ୍ଚ କରିଥିଲେ । ନିର୍ବାଚନ କମିଶନଙ୍କ ଫ୍ଲାଇଂ ସ୍କ୍ବାଡ୍ର ୪ ନମ୍ବର ଟିମ୍ ନବୀନଙ୍କ ସ୍ବତନ୍ତ୍ର ବିମାନର ଯାଞ୍ଚ କରିଥିଲେ ।
ବିମାନରେ ଥିବା ଲଗେଜ୍ ଏବଂ ସିଟ୍ର ମଧ୍ୟ ଯାଞ୍ଚ କରିଥିଲା ଏହି ଟିମ୍ । ପ୍ରାୟ ୧୦ରୁ ୧୫ ମିନିଟ୍ ପର୍ୟ୍ୟନ୍ତ ଫ୍ଲାଇଂ ସ୍କ୍ବାଡ୍ ଦ୍ବାରା ଯାଞ୍ଚ କରାଯାଇଥିଲା । ଏହି ଯାଞ୍ଚ ପ୍ରକ୍ରିୟାରେ ନବୀନ ପଟ୍ଟନାୟକ ମଧ୍ୟ ପୂରା ସହଯୋଗ କରିଥିଲେ । ଏହାପରେ ନବୀନ ପଟ୍ଟନାୟକ ନିର୍ବାଚନୀ ସଭାରେ ଯୋଗଦେଇଥିଲେ । ଦଳୀୟ ପ୍ରାର୍ଥୀ ସ୍ନେହାଙ୍ଗିନୀ ଛୁରିଆଙ୍କ ପାଇଁ ଭୋଟ୍ ମାଗିଥିଲେ । ନିର୍ବାଚନୀ ସଭା ଶେଷ ପରେ ନବୀନ ପଟ୍ଟନାୟକ ଭୁବନେଶ୍ବର ଫେରିଆସିଥିଲେ ।
ସେପଟେ ଏନେଇ ନୂଆପଡ଼ା ଜିଲ୍ଲା ମାଜିଷ୍ଟ୍ରେଟ୍ଙ୍କ ପକ୍ଷରୁ ମଧ୍ୟ ‘ଏକ୍ସ’ ପୋଷ୍ଟ ମାଧ୍ୟମରେ ସୂଚନା ଦିଆଯାଇଛି । ନୂଆପଡ଼ା ଉପନିର୍ବାଚନ ପାଇଁ ଯେହେତୁ ନିର୍ବାଚନ ଆଚରଣବିଧି ଲାଗୁ କରାଯାଇଛି ସେଥିପାଇଁ ନିର୍ବାଚନ କମିଶନଙ୍କ ପକ୍ଷରୁ ଯାଞ୍ଚ କରାଯାଉଛି । ଏହି ପରିପ୍ରେକ୍ଷୀରେ ନିର୍ବାଚନ କମିଶନଙ୍କ ଫ୍ଲାଇଂ ସ୍କ୍ବାଡ୍ର ୪ ନମ୍ବର ଟିମ୍ ଏବଂ ଭିଡିଓ ସର୍ଭିଲାନ୍ସ ଟିମ୍ ଯାଞ୍ଚ କରିଥିଲେ ।
