କନ୍ଧମାଳରେ ପୁଣି ବିରଳ ଯୋଡ଼ା ଶିଶୁ ଜନ୍ମ; ଫେରିଲା ‘ଜଗା-ବଳିଆ’ଙ୍କ ସ୍ମୃତି ମୁଡ଼ିବନ୍ଧର ଦୁର୍ଗମ ଗାଁରୁ ବ୍ରହ୍ମପୁର ଏମ୍କେସିଜି ପର୍ଯ୍ୟନ୍ତ ଚିକିତ୍ସାର ଲଢ଼େଇ
ସଞ୍ଜୟ କୁମାର ପାଣିଗ୍ରାହୀଙ୍କ ରିପୋର୍ଟ
ବାଲିଗୁଡ଼ା, ୧୫/୧୦ : କନ୍ଧମାଳ ମାଟିରେ ପୁଣି ଏକ ବିରଳ ଜନ୍ମକୁ ନେଇ ଚର୍ଚ୍ଚା। ୨୦୧୭ ମସିହାରେ ସମଗ୍ର ଦେଶର ଦୃଷ୍ଟି ଆକର୍ଷଣ କରିଥିବା ଯୋଡ଼ାମୁଣ୍ଡ ଶିଶୁ ‘ଜଗା-ବଳିଆ’ଙ୍କ ଘଟଣା ପୁଣି ଥରେ ମନେ ପଡ଼ିଛି। କନ୍ଧମାଳ ଜିଲ୍ଲାର ତୁମୁଡ଼ିବନ୍ଧ ବ୍ଲକର ଏକ ଦୁର୍ଗମ ଗାଁରୁ ଆସିଥିବା ଏହି ଖବର ଏବେ ଚିକିତ୍ସା ଜଗତରେ ଏକ ଜଟିଳ ଆହ୍ୱାନ ସୃଷ୍ଟି କରିଛି।
ବ୍ରହ୍ମପୁରସ୍ଥିତ ଏମ୍କେସିଜି ମେଡିକାଲ କଲେଜ ଓ ହସ୍ପିଟାଲରେ ଏକ ବିରଳ ଶାରୀରିକ ଗଠନ ଥିବା ଯୋଡ଼ା ଶିଶୁପୁତ୍ର ଜନ୍ମ ନେଇଛନ୍ତି। ଦୁଇଟି ମୁଣ୍ଡ, ଦୁଇଟି ମେରୁଦଣ୍ଡ ଓ ମାତ୍ର ତିନୋଟି ହାତ ଥିବା ଏହି ନବଜାତକଙ୍କ ଶରୀରରେ ହୃତ୍ପିଣ୍ଡ ଓ ଯକୃତ ଗୋଟିଏ ଲେଖାଏଁ ରହିଥିବା ପ୍ରାଥମିକ ଯାଞ୍ଚରୁ ଜଣାପଡ଼ିଛି।
ଏହା ସହ ଅନ୍ୟାନ୍ୟ ଜଟିଳ ଶାରୀରିକ ସମସ୍ୟା ମଧ୍ୟ ଚିହ୍ନଟ ହୋଇଛି। ଶିଶୁଙ୍କ ସ୍ଥିତିକୁ ନେଇ ଡାକ୍ତରୀ ଦଳ ସତର୍କ ରହିଥିବାବେଳେ ଉନ୍ନତ ଚିକିତ୍ସା ଓ ପରବର୍ତ୍ତୀ ପଦକ୍ଷେପକୁ ନେଇ ଚର୍ଚ୍ଚା ଜୋର ଧରିଛି।
ଦୁର୍ଗମ ଗାଁରୁ ମେଡିକାଲ, ଜଟିଳ ହେଲା ପ୍ରସବ ସ୍ଥିତି ପ୍ରାପ୍ତ ସୂଚନାନୁସାରେ, ତୁମୁଡ଼ିବନ୍ଧ ବ୍ଲକ ଅନ୍ତର୍ଗତ ଦୁର୍ଗମ ତିଡ଼ିପଦର ଗ୍ରାମର ତ୍ରିଲୋଚନ ମାଝୀଙ୍କ ପତ୍ନୀ ରୁନି ମାଝୀ ଗର୍ଭବତୀ ଥିଲେ।
ଗତ ରବିବାର ତାଙ୍କର ପ୍ରସବ ବେଦନା ଆରମ୍ଭ ହେବା ପରେ ପରିବାର ଲୋକେ ତାଙ୍କୁ ସ୍ଥାନୀୟ ସ୍ୱାସ୍ଥ୍ୟକେନ୍ଦ୍ରକୁ ନେଇଥିଲେ। ସେଠାରେ ତାଙ୍କ ସ୍ୱାସ୍ଥ୍ୟାବସ୍ଥା ଜଟିଳ ହେବାରୁ ଡାକ୍ତରଙ୍କ ପରାମର୍ଶରେ ବ୍ରହ୍ମପୁର ଏମ୍କେସିଜି ମେଡିକାଲକୁ ସ୍ଥାନାନ୍ତର କରାଯାଇଥିଲା।
ସେଠାରେ ସ୍ତ୍ରୀ ଓ ପ୍ରସୂତି ବିଭାଗର ବିଶେଷଜ୍ଞମାନେ ଗର୍ଭସ୍ଥ ଶିଶୁଙ୍କ ସ୍ଥିତି ଜଟିଳ ଥିବା ଜାଣିବା ପରେ ଜରୁରୀକାଳୀନ ଭିତ୍ତିରେ ସିଜେରିଆନ୍ ଅସ୍ତ୍ରୋପଚାର କରିଥିଲେ। ଏହାପରେ ଯୋଡ଼ା ଶିଶୁପୁତ୍ର ଜନ୍ମ ନେଇଥିଲେ। ନବଜାତ ଶିଶୁଙ୍କ ମୋଟ ଓଜନ ପ୍ରାୟ ୨.୬ କିଲୋଗ୍ରାମ ବୋଲି ସୂଚନା ମିଳିଛି।
ଅନ୍ୟପକ୍ଷରେ, ପ୍ରସୂତି ରୁନି ମାଝୀଙ୍କ ସ୍ୱାସ୍ଥ୍ୟାବସ୍ଥା ସ୍ଥିର ଥିବାବେଳେ ସେ ଡାକ୍ତରଖାନାରେ ଚିକିତ୍ସାଧୀନ ଅଛନ୍ତି।
ଗୋଟିଏ ହୃତ୍ପିଣ୍ଡ, ଗୋଟିଏ ଯକୃତ; ଚିକିତ୍ସାରେ ଜଟିଳତା
ଏହି ନବଜାତ ଶିଶୁଙ୍କ ଶାରୀରିକ ଗଠନ ଡାକ୍ତରଙ୍କ ପାଇଁ ଏକ ଜଟିଳ ଚିକିତ୍ସାଗତ ପରିସ୍ଥିତି ସୃଷ୍ଟି କରିଛି। ପ୍ରାଥମିକ ଯାଞ୍ଚ ଓ ଇମେଜିଂ ପରୀକ୍ଷାରୁ ଶିଶୁଙ୍କର ଦୁଇଟି ମୁଣ୍ଡ ଓ ଦୁଇଟି ମେରୁଦଣ୍ଡ ଥିବା ଜଣାପଡ଼ିଛି। ଶରୀରରେ ତିନୋଟି ହାତ ଓ ଦୁଇଟି ଗୋଡ଼ ରହିଛି। ତେବେ ହୃତ୍ପିଣ୍ଡ, ଯକୃତ ଓ ଯୌନାଙ୍ଗ ଗୋଟିଏ ଲେଖାଏଁ ଥିବା ସହ ମଳଦ୍ୱାର ନଥିବା ଭଳି ଜଟିଳତା ମଧ୍ୟ ସାମ୍ନାକୁ ଆସିଛି।
ଜନ୍ମ ପରେ ଶ୍ୱାସକ୍ରିୟାରେ ସମସ୍ୟା ଦେଖାଦେବାରୁ ଶିଶୁଙ୍କୁ ସ୍ୱତନ୍ତ୍ର ନବଜାତ ଶିଶୁ ଯତ୍ନ ୟୁନିଟ୍ (ଏସ୍ଏନ୍ସିୟୁ)ରେ ରଖାଯାଇଛି। ସେଠାରେ ଡାକ୍ତରୀ ଦଳ ଶିଶୁଙ୍କ ଶ୍ୱାସକ୍ରିୟା ସମେତ ଅନ୍ୟାନ୍ୟ ଶାରୀରିକ କ୍ରିୟା ଉପରେ ନିରନ୍ତର ନଜର ରଖିଛନ୍ତି। ଶରୀରର ଗୁରୁତ୍ୱପୂର୍ଣ୍ଣ ଅଙ୍ଗ ଅଂଶୀଦାର ହୋଇଥିବାରୁ ଚିକିତ୍ସା ଓ ଅସ୍ତ୍ରୋପଚାରର ସମ୍ଭାବନା ନିର୍ଦ୍ଧାରଣ କରିବା ସହଜ ନୁହେଁ। ତେଣୁ ଶିଶୁଙ୍କ ଶରୀରର ଆଭ୍ୟନ୍ତରୀଣ ଗଠନ, ଅଙ୍ଗପ୍ରତ୍ୟଙ୍ଗର କାର୍ୟ୍ୟକ୍ଷମତା ଓ ସ୍ୱାସ୍ଥ୍ୟାବସ୍ଥାର ସମ୍ପୂର୍ଣ୍ଣ ମୂଲ୍ୟାୟନ ପରେ ହିଁ ପରବର୍ତ୍ତୀ ପଦକ୍ଷେପ ନିଆଯିବ।
ଏମ୍କେସିଜି ମେଡିକାଲର ଶିଶୁ ଶଲ୍ୟ ଚିକିତ୍ସା ବିଭାଗର ମୁଖ୍ୟ ପ୍ରଫେସର ଡାକ୍ତର ମାନସ ରଞ୍ଜନ ଦାଶଙ୍କ ସୂଚନା ଅନୁଯାୟୀ, ଏଭଳି ଜନ୍ମ ଅତ୍ୟନ୍ତ ବିରଳ। ପ୍ରାୟ ୩ ଲକ୍ଷରୁ ୪ ଲକ୍ଷ ଗର୍ଭଧାରଣ ମଧ୍ୟରେ ଏଭଳି ଘଟଣା ଗୋଟିଏ ଦେଖିବାକୁ ମିଳିପାରେ। ଚିକିତ୍ସା ବିଜ୍ଞାନରେ ଏହି ଅବସ୍ଥାକୁ ‘ପାରାପାଗସ୍ କନ୍ଜଏଣ୍ଟ ଟ୍ୱିନ୍ସ’ କୁହାଯାଏ।
ଏହି ଅବସ୍ଥାରେ ଯାଆଁଳା ଶିଶୁଙ୍କ ଶରୀର ପାର୍ଶ୍ୱବର୍ତ୍ତୀ ଭାବେ ଯୋଡ଼ି ହୋଇ ରହିଥାଏ ଏବଂ କେତେକ ଆଭ୍ୟନ୍ତରୀଣ ଅଙ୍ଗ ଅଂଶୀଦାର ହୋଇଥାଏ।
ଶିଶୁଙ୍କ ଶାରୀରିକ ଗଠନ ଓ ଅଙ୍ଗପ୍ରତ୍ୟଙ୍ଗର ସ୍ଥିତି ଅନୁଯାୟୀ ଚିକିତ୍ସାର ଜଟିଳତା ନିର୍ଭର କରିଥାଏ।
ଡାକ୍ତର ଦାଶଙ୍କ ସୂଚନା ଅନୁଯାୟୀ, ଶିଶୁଙ୍କ ଶରୀରର ଆଭ୍ୟନ୍ତରୀଣ ଅଙ୍ଗପ୍ରତ୍ୟଙ୍ଗର ସ୍ଥିତି ଜାଣିବା ପାଇଁ ପରୀକ୍ଷା କରାଯାଇଛି। ହୃତ୍ପିଣ୍ଡ ଓ ଯକୃତ ଭଳି ଗୁରୁତ୍ୱପୂର୍ଣ୍ଣ ଅଙ୍ଗ ଗୋଟିଏ ଲେଖାଏଁ ଥିବାରୁ ଶିଶୁଙ୍କୁ ଅଲଗା କରିବା ଅତ୍ୟନ୍ତ ଜଟିଳ ହୋଇପାରେ। ମଳଦ୍ୱାର ନଥିବା କାରଣରୁ ମଧ୍ୟ ଜରୁରୀ ଚିକିତ୍ସାର ଆବଶ୍ୟକତା ରହିଛି।
ଶିଶୁଙ୍କ ସ୍ଥିତି ଓ ଚିକିତ୍ସାର ଆବଶ୍ୟକତାକୁ ଦେଖି ଆଗାମୀ ପଦକ୍ଷେପ ନିଆଯିବ। ଆବଶ୍ୟକ ପଡ଼ିଲେ ଉନ୍ନତ ଚିକିତ୍ସା ପାଇଁ ଭୁବନେଶ୍ୱର ଏମ୍ସକୁ ସ୍ଥାନାନ୍ତର କରାଯାଇପାରେ।
କନ୍ଧମାଳର ଏହି ଘଟଣା ୨୦୧୭ ମସିହାରେ ସାରା ଦେଶରେ ଚର୍ଚ୍ଚା ସୃଷ୍ଟି କରିଥିବା ଯୋଡ଼ାମୁଣ୍ଡ ଶିଶୁ ଜଗା-ବଳିଆଙ୍କ କଥାକୁ ପୁଣି ଥରେ ମନେ ପକାଇ ଦେଇଛି। ଫିରିଙ୍ଗିଆ ବ୍ଲକର ମିଲିପଡ଼ା ଗ୍ରାମର ଭୂୟାଁ କହଁର ଓ ପୁଷ୍ପାଞ୍ଜଳିଙ୍କ ପୁଅ ଜଗା-ବଳିଆ ଜନ୍ମରୁ ଯୋଡ଼ାମୁଣ୍ଡ ଶିଶୁ ଥିଲେ। ସେମାନଙ୍କ ମୁଣ୍ଡ ଯୋଡ଼ି ହୋଇ ରହିଥିବାରୁ ଚିକିତ୍ସା ଦୃଷ୍ଟିରୁ ଏହା ଏକ ବିରଳ ମାମଲା ଥିଲା।
ସେତେବେଳେ ରାଜ୍ୟ ସରକାରଙ୍କ ସହଯୋଗରେ ଉଭୟଙ୍କୁ ନୂଆଦିଲ୍ଲୀ ଏମ୍ସକୁ ନିଆଯାଇଥିଲା। ଦେଶବିଦେଶର ବିଶେଷଜ୍ଞ ଡାକ୍ତରମାନେ ଦୁଇଟି ପର୍ଯ୍ୟାୟରେ ପ୍ରାୟ ୪୫ ଘଣ୍ଟାରୁ ଅଧିକ ସମୟ ଧରି ଜଟିଳ ଅସ୍ତ୍ରୋପଚାର କରି ୨୦୧୭ ଅକ୍ଟୋବରରେ ଉଭୟଙ୍କୁ ଅଲଗା କରିବାରେ ସଫଳ ହୋଇଥିଲେ। ଏହି ଅସ୍ତ୍ରୋପଚାର ଦେଶର ଚିକିତ୍ସା ଇତିହାସରେ ଏକ ଉଲ୍ଲେଖନୀୟ ଘଟଣା ହୋଇ ରହିଥିଲା।
ତେବେ ଏହି ସଫଳତା ପରେ ମଧ୍ୟ ଦୁଃଖଦ ଅଧ୍ୟାୟ ଯୋଡ଼ି ହୋଇଥିଲା। ଦିଲ୍ଲୀରୁ ଫେରିବା ପରେ ଉଭୟେ କଟକ ଏସ୍ସିବି ମେଡିକାଲରେ ଦୀର୍ଘ ଦିନ ଧରି ଚିକିତ୍ସାଧୀନ ରହିଥିଲେ।
୨୦୨୦ ନଭେମ୍ବର ୨୫ରେ ଚିକିତ୍ସାଧୀନ ଅବସ୍ଥାରେ ବଳିଆଙ୍କ ମୃତ୍ୟୁ ହୋଇଥିଲା। ଅନ୍ୟପକ୍ଷରେ ଜଗା ନିଜ ପରିବାର ସହ ରହି ଜୀବନ ବିତାଉଛି।
ଚିକିତ୍ସା ବିଜ୍ଞାନ ଆଗରେ ନୂଆ ଆହ୍ୱାନ
ତୁମୁଡ଼ିବନ୍ଧର ଏହି ନବଜାତ ଶିଶୁଙ୍କ ଘଟଣା କେବଳ ଏକ ବିରଳ ଜନ୍ମର ଖବର ନୁହେଁ; ଏହା ଉନ୍ନତ ଚିକିତ୍ସା, ବିଶେଷଜ୍ଞଙ୍କ ସମନ୍ୱୟ ଓ ନବଜାତଙ୍କ ଜୀବନରକ୍ଷା ପାଇଁ ଆବଶ୍ୟକ ସମସ୍ତ ସୁବିଧାର ଗୁରୁତ୍ୱକୁ ମଧ୍ୟ ସାମ୍ନାକୁ ଆଣିଛି। ଏଭଳି ଜଟିଳ ଅବସ୍ଥାରେ ପ୍ରତ୍ୟେକ ଚିକିତ୍ସାଗତ ନିଷ୍ପତ୍ତି ବିଶେଷଜ୍ଞଙ୍କ ସମ୍ପୂର୍ଣ୍ଣ ମୂଲ୍ୟାୟନ ଓ ଶିଶୁଙ୍କ ସ୍ୱାସ୍ଥ୍ୟାବସ୍ଥା ଉପରେ ନିର୍ଭର କରିଥାଏ।
ଏବେ ସମସ୍ତଙ୍କ ନଜର ଏମ୍କେସିଜି ମେଡିକାଲର ଡାକ୍ତରୀ ଦଳ ଉପରେ। ଶିଶୁଙ୍କ ସ୍ଥିତିରେ କି ପରିବର୍ତ୍ତନ ଆସୁଛି, କେଉଁ ପ୍ରକାର ଚିକିତ୍ସା ଆବଶ୍ୟକ ହେଉଛି ଏବଂ ଉନ୍ନତ ଚିକିତ୍ସା ପାଇଁ ଅନ୍ୟ ମେଡିକାଲକୁ ସ୍ଥାନାନ୍ତରର ଆବଶ୍ୟକତା ପଡ଼ୁଛି କି ନାହିଁ—ତାହା ଆଗାମୀ ସମୟରେ ସ୍ପଷ୍ଟ ହେବ।
ବର୍ତ୍ତମାନ ପାଇଁ ଏହି ବିରଳ ଜନ୍ମ ଚିକିତ୍ସା ବିଜ୍ଞାନ ପାଇଁ ଏକ ଗମ୍ଭୀର ଆହ୍ୱାନ ହୋଇ ରହିଥିବାବେଳେ, ନବଜାତ ଶିଶୁଙ୍କ ସ୍ୱାସ୍ଥ୍ୟାବସ୍ଥା ଓ ଆଗାମୀ ଚିକିତ୍ସାକୁ ନେଇ ଅପେକ୍ଷା ବଢ଼ିଛି।
‘ମୁଁ କାହିଁକି ପ୍ରାର୍ଥୀ’ ମଞ୍ଚରେ ଛାତ୍ରନେତାଙ୍କ ଭିଜନ୍; ୮ ପଦବି ପାଇଁ ୩୧ ପ୍ରାର୍ଥୀଙ୍କ ଭାଗ୍ୟ ନିର୍ଦ୍ଧାରଣ କରିବେ ଭୋଟର୍
ବାଲିଗୁଡ଼ା, ୧୫/୧୦ : ଦୀର୍ଘ ୪୬ ବର୍ଷର ଅପେକ୍ଷାରେ ପଡ଼ିଛି ପୂର୍ଣ୍ଣଚ୍ଛେଦ। ମହାବିଦ୍ୟାଳୟ ରେ ଛାତ୍ର ପ୍ରତିନିଧିତ୍ୱକୁ ନେଇ ନୂଆ ଅଧ୍ୟାୟ ରଚିବାକୁ ଯାଉଛି ବାଲିଗୁଡ଼ା ଆଦିବାସୀ ମହାବିଦ୍ୟାଳୟ। ଦୀର୍ଘ ବର୍ଷର ବ୍ୟବଧାନ ପରେ ପ୍ରଥମ ଥର ପାଇଁ ହେଉଥିବା ଛାତ୍ର ସଂସଦ ନିର୍ବାଚନକୁ ନେଇ କଲେଜ ପରିସରରେ ଉତ୍ସାହ ଚରମ ସୀମାରେ ପହଞ୍ଚିଛି।
ପ୍ରଚାର ପର୍ବ ଶେଷ ହୋଇଥିବା ବେଳେ ଏବେ ଭୋଟରଙ୍କ ରାୟ ଉପରେ ନଜର ରହିଛି ୩୧ ପ୍ରାର୍ଥୀଙ୍କର। କେବଳ ପଦପଦବି ହାସଲ ନୁହେଁ, ବରଂ ଛାତ୍ରଛାତ୍ରୀଙ୍କ ସ୍ୱରକୁ କଲେଜ ପ୍ରଶାସନ ନିକଟରେ ପହଞ୍ଚାଇବା ଏବଂ ସେମାନଙ୍କ ସମସ୍ୟାର ସମାଧାନ କରିବାର ଦାୟିତ୍ୱ କାହା ହାତକୁ ଯିବ, ତାହା ନିର୍ଦ୍ଧାରଣ କରିବ ଏହି ନିର୍ବାଚନ।
ବୁଧବାର ମହାବିଦ୍ୟାଳୟର ସଭାଗୃହରେ ଆୟୋଜିତ ‘ମୁଁ କାହିଁକି ପ୍ରାର୍ଥୀ ହୋଇଛି’ କାର୍ୟ୍ୟକ୍ରମରେ ପ୍ରାର୍ଥୀମାନେ ନିଜ ନିଜର ଉଦ୍ଦେଶ୍ୟ, ଚିନ୍ତାଧାରା ଓ ଭବିଷ୍ୟତ ଯୋଜନା ଉପସ୍ଥାପନ କରିଥିଲେ।
ନିର୍ବାଚନୀ ପ୍ରଚାରର ଶେଷ ପର୍ଯ୍ୟାୟରେ ଏହି ମଞ୍ଚ ପ୍ରାର୍ଥୀଙ୍କ ପାଇଁ ନିଜର ଯୋଗ୍ୟତା ଓ ଲକ୍ଷ୍ୟ ରଖିବାର ଏକ ଗୁରୁତ୍ୱପୂର୍ଣ୍ଣ ସୁଯୋଗ ପାଲଟିଥିଲା।
ଛାତ୍ରଛାତ୍ରୀଙ୍କ ସ୍ୱାର୍ଥରକ୍ଷା, ଶୈକ୍ଷିକ ପରିବେଶର ଉନ୍ନତି, କ୍ରୀଡ଼ା ଓ ସହ ପାଠ୍ୟକ୍ରମ କାର୍ଯ୍ୟ କଳାପ କୁ ଅଧିକ ସକ୍ରିୟ କରିବା ସହ ମହାବିଦ୍ୟାଳୟର ବିକାଶରେ ଛାତ୍ର ପ୍ରତିନିଧିଙ୍କ ଭୂମିକାକୁ ନେଇ ପ୍ରାର୍ଥୀମାନେ ନିଜ ନିଜର ମତ ରଖିଥିଲେ। କାର୍ଯ୍ୟକ୍ରମରେ ମହାବିଦ୍ୟାଳୟ ପରିଚାଳନା କମିଟିର ସଭାପତି ତଥା ଉପଜିଲ୍ଲାପାଳ ପ୍ରଣୀତା ଦାସ, ମାଜିଷ୍ଟ୍ରେଟ୍ ତଥା ତହସିଲଦାର ଦୀପ୍ତି ପ୍ରକାଶ ବେହେରା, ନିର୍ବାଚନ ଅଧିକାରୀ ଅଧ୍ୟାପକ ତେଜେଶ୍ୱର ନାୟକ, ସହନିର୍ବାଚନ ଅଧିକାରୀ ଅଧ୍ୟାପକ ସରୋଜ ପାଠୀ ଓ ଅଧ୍ୟାପକ ହିମାଂଶୁ ଶେଖର ସାହୁଙ୍କ ସମେତ ମହାବିଦ୍ୟାଳୟର ଅଧ୍ୟକ୍ଷ ଡ. ବିଭୂତି ଭୂଷଣ ଆଚାର୍ଯ୍ୟ ଉପସ୍ଥିତ ଥିଲେ।
ମହାବିଦ୍ୟାଳୟରେ ମୋଟ ୮ଟି ବିଭିନ୍ନ ପଦବି ପାଇଁ ୩୧ ଜଣ ପ୍ରାର୍ଥୀ ନିର୍ବାଚନୀ ମଇଦାନରେ ଅଛନ୍ତି। ପ୍ରକାଶିତ ପ୍ରାର୍ଥୀ ତାଲିକା ଅନୁଯାୟୀ, ସଭାପତି ପଦ ପାଇଁ ୭ ଜଣ, ଉପସଭାପତି ପଦ ପାଇଁ ୪ ଜଣ, ସାଧାରଣ ସମ୍ପାଦକ ପଦ ପାଇଁ ୪ ଜଣ, ସହସମ୍ପାଦକ ପଦ ପାଇଁ ୩ ଜଣ, ଡିଏସଏ ସମ୍ପାଦକ ପଦ ପାଇଁ ୩ ଜଣ, ଡିଏସଏ ସହସମ୍ପାଦକ ପଦ ପାଇଁ ୩ ଜଣ, କ୍ରୀଡ଼ା ସମ୍ପାଦକ ପଦ ପାଇଁ ୪ ଜଣ ଏବଂ କ୍ରୀଡ଼ା ସହସମ୍ପାଦକ ପଦ ପାଇଁ ୩ ଜଣ ପ୍ରାର୍ଥୀ ରହିଛନ୍ତି। ପ୍ରାର୍ଥୀଙ୍କ ସଂଖ୍ୟା ଓ ବିଭିନ୍ନ ପଦବି ପାଇଁ ପ୍ରତିଦ୍ୱନ୍ଦ୍ୱିତା ନିର୍ବାଚନକୁ ରୋଚକ କରିଛି। ଦୀର୍ଘ ବର୍ଷ ପରେ ନିର୍ବାଚନ ହେଉଥିବାରୁ ଏହା କେବଳ ଏକ ପଦବି ହାସଲର ପ୍ରତିଯୋଗିତା ନୁହେଁ, ଛାତ୍ରଛାତ୍ରୀଙ୍କ ମଧ୍ୟରେ ନେତୃତ୍ୱ ଓ ପ୍ରତିନିଧିତ୍ୱର ଭାବନାକୁ ମଜଭୁତ କରିବାର ଏକ ସୁଯୋଗ ଭାବେ ଦେଖାଯାଉଛି।
ନିର୍ବାଚନ କାର୍ଯ୍ୟସୂଚୀ ଅନୁଯାୟୀ, ଗୁରୁବାର ୧୫ ତାରିଖ ସକାଳ ୮ଟାରୁ ଅପରାହ୍ନ ୨ଟା ପର୍ଯ୍ୟନ୍ତ ମତଦାନ ହେବ। ଏହାପରେ ଅପରାହ୍ନ ୫ଟାରେ ବିଜୟୀ ପ୍ରାର୍ଥୀଙ୍କ ନାମ ଘୋଷଣା କରାଯିବ। ଶୁକ୍ରବାର ୧୬ ତାରିଖରେ ନବନିର୍ବାଚିତ ଛାତ୍ର ପ୍ରତିନିଧିମାନେ ଶପଥ ଗ୍ରହଣ କରିବେ।
ନିର୍ବାଚନ ପ୍ରକ୍ରିୟାକୁ ଅବାଧ, ନିରପେକ୍ଷ ଓ ଶୃଙ୍ଖଳିତ ରଖିବା ପାଇଁ କଲେଜ କର୍ତ୍ତୃପକ୍ଷ ପ୍ରସ୍ତୁତି କରିଥିବା ବେଳେ ପୁଲିସ ପ୍ରଶାସନ ପକ୍ଷରୁ ମଧ୍ୟ ଆବଶ୍ୟକ ସୁରକ୍ଷା ବ୍ୟବସ୍ଥା ଗ୍ରହଣ କରାଯାଇଛି। ଲିଙ୍ଗଡୋ କମିଶନଙ୍କ ନିୟମାବଳୀକୁ କଡ଼ାକଡ଼ି ପାଳନ କରିବା ପାଇଁ ପ୍ରଶାସନ ଓ ଛାତ୍ର ସଂଗଠନ ଗୁଡ଼ିକୁ ନିର୍ଦ୍ଦେଶ ଦିଆଯାଇଛି। ଏବେ ସମସ୍ତଙ୍କ ନଜର ମତଦାନ ଉପରେ।
୪୬ ବର୍ଷର ଦୀର୍ଘ ବ୍ୟବଧାନ ପରେ ହେଉଥିବା ଏହି ନିର୍ବାଚନରେ ଛାତ୍ରଛାତ୍ରୀ କେଉଁମାନଙ୍କୁ ନିଜର ପ୍ରତିନିଧି ଭାବେ ବାଛୁଛନ୍ତି, ତାହା ଫଳାଫଳରୁ ସ୍ପଷ୍ଟ ହେବ। ବିଜୟୀ ପ୍ରାର୍ଥୀଙ୍କ ପାଇଁ ଏହା ଉତ୍ସବର ମୁହୂର୍ତ୍ତ ହେବା ସହ ଛାତ୍ରଛାତ୍ରୀଙ୍କ ଆଶା ଓ ଆକାଂକ୍ଷା ପୂରଣ କରିବାର ଏକ ନୂଆ ଦାୟିତ୍ୱ ମଧ୍ୟ ହେବ।
