ଅଟଳ ବିହାରୀ ବାଜପେୟୀ ଟ୍ରଷ୍ଟ ଅଧ୍ୟକ୍ଷଙ୍କ ଉପରେ ମରଣାନ୍ତକ ଆକ୍ରମଣ
ପାରାଦୀପ,୨ା୩:ପାରାଦୀପର ଅଟଳ ବିହାରୀ ବାଜପେୟୀ ଟ୍ରଷ୍ଟର ଅଧ୍ୟକ୍ଷ ଅଜିତ କୁମାର ଦାସଙ୍କ ଉପରେ ମରଣାନ୍ତକ ଆକ୍ରମଣ ହୋଇଛି । ଶ୍ରୀ ଦାସ ରାତି ପ୍ରାୟ ୧୦ଟା ସମୟରେ ନିଜ ଘର ମଧୁବନ ଜଗନ୍ନାଥ ମନ୍ଦିର ନିକଟସ୍ଥ ଜଗନ୍ନାଥ କଲୋନୀ(ବଙ୍ଗାଳୀପଡା)କୁ ମୋଟର ସାଇକେଲ ଯୋଗେ ଫେରୁଥିବା ବେଳେ ଏହି ଆକ୍ରମଣର ଶୀକାର ହୋଇଥିଲେ ।
ଆକ୍ରମଣ ପରେ ତାଙ୍କୁ ତୁରନ୍ତ ଅଠରବାଙ୍କୀ ମେଡିକାଲକୁ ନିଆଯାଇଥିଲା । ଅବସ୍ଥା ଗୁରୁତର ଥିବାରୁ ତାଙ୍କୁ କଟକ ସ୍ଥାନାନ୍ତରିତ କରାଯାଇଛି । ଆକ୍ରମଣ ଘଟଣା ସମ୍ପର୍କରେ ଶ୍ରୀ ଦାସଙ୍କ ଝିଅ ଗଙ୍ଗା ଦାସ ବୁଧବାର ଦିନ ରାତିରେ ପାରାଦୀପ ଆଦର୍ଶ ଥାନାରେ ଲିଖିତ ଅଭିଯୋଗ କରିଛନ୍ତି । ଅଭିଯୋଗ ପାଇବା ପରେ ପୋଲିସ୍ ତଦନ୍ତ ଆରମ୍ଭ କରିଛି । ପୋଲିସ୍ ଆକ୍ରମଣ ଘଟଣାରେ ସଂପୃକ୍ତି ନେଇ ଜଗନ୍ନାଥ କଲୋନୀର ଜଣେ ବ୍ୟକ୍ତିଙ୍କ ଥାନାକୁ ଆନି ପଚରା ଉଚରା କରୁଥିବା ଜଣାପଡିଛି ।
ପ୍ରକାଶଥାଉକି, ପାରାଦୀପରେ ପୂର୍ବତନ ପ୍ରଧାନମନ୍ତ୍ରୀ ଅଟଳ ବିହାରୀ ବାଜପେୟୀଙ୍କ ପ୍ରତିମୂର୍ତ୍ତୀ ପ୍ରତିଷ୍ଠା ସମୟରେ ଭୂବନେଶ୍ୱର ସାଂସଦ ଅପରାଜିତା ଷଡଙ୍ଗୀଙ୍କୁ ଶ୍ରୀ ଦାସ ଆଣି ପ୍ରତିଷ୍ଠା କରାଇଥିଲେ । ଏହା ପରେ ତାଙ୍କୁ ବିଜେପି ଜିଲ୍ଲା ଉପସଭାପତି ପଦବୀରୁ ବହିଷ୍କାର କରାଯାଇଥିଲା । ଦଳୀୟ ଅନ୍ତ କନ୍ଦଳ କିମ୍ବା ବସ୍ତିରେ ଅନ୍ତ କନ୍ଦଳକୁ ନେଇ କିଛି ଦିନ ହେଲା ଶ୍ରୀ ଦାସ ବିବାଦ ଘେରରେ ରହି ଆସିଥିଲେ ।
ପାରାଦୀପ ପୌର କାର୍ଯ୍ୟାଳୟରେ ସାଇକେଲ ବଣ୍ଟନ
ପାରାଦୀପ,୨ା୩:ଗୁରୁବାର ଦିନ ମାନ୍ୟବର ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ରାଜ୍ୟର ବିଭିନ୍ନ ପୌର ପାଳିକାରେ କାର୍ଯ୍ୟ କରୁଥିବା କର୍ମୀମାନଙ୍କୁ ସାଇକେଲ ବଣ୍ଟନ କରିଥିଲେ । ଅନୁରୂପ ଭାବେ ପାରାଦୀପ ପୌର କାର୍ଯ୍ୟାଳୟ ପରିସରରେ ମିଶନ ଶକ୍ତି ଅଧିନରେ ସାଇକେଲ ବଣ୍ଟନ କରାଯାଇଥିଲା ।
ପାରାଦୀପର ପୌରପାଳ ବସନ୍ତ ବିଶ୍ୱାଳ ମାନ୍ୟବର ମୁଖ୍ୟମନ୍ତ୍ରୀଙ୍କ ଏହି ଯୁଗାନ୍ତକାରୀ ପଦକ୍ଷେପକୁ ପ୍ରଶଂସା କରିଥିଲେ । ପାରାଦୀପ ପୌର ପାଳିକା ଅଧିନରେ କାର୍ଯ୍ୟରତ ଏମ୍.ସି.ସି.ପଏଣ୍ଟ, ସ୍ୱଛ କର୍ମୀ,ସ୍ୱଛ ସାଥୀ, ଜଳ ସାଥୀ,ଆହାର କେନ୍ଦ୍ରକର୍ମୀମାନଙ୍କୁ ୮୦ ଗୋଟି ସାଇକେଲ ପ୍ରଦାନ କରାଯାଇଥିଲା । ପୌରପାଳ ଶ୍ରୀ ବିଶ୍ୱାଳଙ୍କ ସମେତ ପୌର ଉପାଧ୍ୟକ୍ଷା ଓ ପାରିଷଦମାନେ ଏହି କାର୍ଯ୍ୟକ୍ରମରେ ଉପସ୍ଥିତ ଥିଲେ ।
ରାଧାକୃଷ୍ଣ ଗୋରସ ସମିତିର ପ୍ରସ୍ତୁତି ବୈଠକ
ପାରାଦୀପ,୨ା୩:ପାରାଦୀପ ଷଣ୍ଢକୁଦ ଅଂଚଳରେ ଥିବା ସର୍ବପୁରାତନ ଅନୁଷ୍ଠାନ ରାଧାକୃଷ୍ଣ ଗୋରସ ସମିତି ପକ୍ଷରୁ ୨୩ ତମ ପଂଚୁ ଦୋଳମେଳଣ ଉପଲକ୍ଷେ ପ୍ରସ୍ତୁତି ବୈଠକ ଅନୁଷ୍ଠିତ ହୋଇଯାଇଛି । ସମିତିର ସଭାପତି ଗଦାଧର ଦାସ ଏହି ବୈଠକରେ ସଭାପତିତ୍ୱ କରିଥିଲେ । ୧୨ ତାରିଖ ଦିନ ଲଉଡି ଖେଳ ଶୋଭାଯାତ୍ରା ଏବଂ ଉଦଘାଟନୀ ଉତ୍ସବ ଅନୁଷ୍ଠିତ ହେବା ସହ ୧୩ ତାରିଖ ଦିନ ସଂଧ୍ୟାରେ ଲଉଡି ଖେଳ ପ୍ରତିଯୋଗିତା,୧୪ ଓ ୧୫ ତାରିଖ ଦିନ ମୁକ୍ତାକାଶ ନାଟକ ପରିବେଷଣ କରାଯିବ ।
ଏହି କାର୍ଯ୍ୟକ୍ରମରେ ବହୁ ସଂଖ୍ୟାରେ ଯୋଗଦାନ କରିବାକୁ ସଭାପତି ଶ୍ରୀ ଦାସ ନିବେଦନ କରିଛନ୍ତି । ଏହି ପ୍ରସ୍ତୁତି ବୈଠକରେ ନୃସିଂହ ଚରଣ ବେହେରା, ନିତ୍ୟାନନ୍ଦ ବେହେରା,ଅମୁଲ୍ୟ ଦାସ,ରମେଶ ଦାସ,ଅଜୟ ବେହେରା, ମଧୁସୂଦନ ପରିଡା,ଅନିରୁଦ୍ଧ ଗାଇଆ,ମହେନ୍ଦ୍ର ପଲେଇ,ଶ୍ରୀକାନ୍ତ ଶୁକ୍ଲ ପ୍ରମୁଖ ଯୋଗ ଦେଇଥିଲେ ।
