ଦୀପାବଳିରେ ଅଘଟଣ, ପୁଅକୁ ବଞ୍ଚାଇବାକୁ ଯାଇ ବୁଡ଼ିଗଲେ ବାପା
November 12
12:17
2023
କଟକ,୧୨/୧୧: ନଦୀରୁ ପୁଅକୁ ଉଦ୍ଧାର କରିବା ବେଳେ ବୁଡ଼ିଯାଇ ବାପାଙ୍କ ମୃତ୍ୟୁ ହୋଇଥିବାର ଖବର ମିଳିଛି। ସୂଚନା ଅନୁଯାୟୀ, କଟକ ନିକଟ ନରାଜ କୈବର୍ତ୍ତସାହି ନଦୀଘାଟକୁ ଆଜି ସକାଳେ ଶରତ ସାହୁ ନାମକ ଜଣେ ଯୁବକ ନିଜର ୮ ବର୍ଷର ପୁଅକୁ ସାଙ୍ଗରେ ଧରି ନଦୀକୁ ଗାଧୋଇବାକୁ ଯାଇଥିଲେ। ହେଲେ ଉଭୟେ ଗାଧୋଇବା ସମୟରେ ଅସାବଧାନତାବଶତଃ ପୁଅ ନଦୀ ଭିତରକୁ ଚାଲିଯାଇଥିଲା। ଏଣେ ପୁଅକୁ ରକ୍ଷା କରିବାକୁ ଯାଇଥିଲେ ଶରତ।
ପୁଅକୁ ସୁରକ୍ଷିତଭାବେ ନଦୀକୂଳକୁ ଫେରାଇ ଆଣିବାରେ ସେ ସକ୍ଷମ ହୋଇଥିଲେ। ମାତ୍ର ନିଜେ ଗୁରୁତର ହୋଇପଡ଼ିଥିଲେ। ତାଙ୍କୁ ଲୋକେ କଟକ ବଡ଼ ଡାକ୍ତରଖାନାକୁ ନେଇଥିଲେ। ହେଲେ ଶରତ ସାହୁଙ୍କୁ ସେଠାରେ ମୃତ ଘୋଷଣା କଲେ ଡାକ୍ତର। ଏହି ଘଟଣା ପ୍ରଚାରିତ ହେବା ପରେ ସ୍ଥାନୀୟ ଅଞ୍ଚଳରେ ଶୋକର ଛାୟା ଖେଳିଯାଇଛି। ଏହି ଘଟଣା ସାଢ଼େ ୯ଟା ବେଳେ ଘଟିଥିଲା। ବଡ଼ ଡାକ୍ତରଖାନାରେ ଶବ ବ୍ୟବଚ୍ଛେଦ କରାଯିବା ପରେ ପରିବାରକୁ ହସ୍ତାନ୍ତର କରାଯିବ ବୋଲି ଜଣାଯାଇଛି।
