ଟ୍ୱିନସିଟିରେ ଡେଙ୍ଗୁର ଆତଙ୍କ, ଭୁବନେଶ୍ୱର ପରେ ପରେ କଟକରୁ ସଂକ୍ରମିତ ଚିହ୍ନଟ
କଟକ, ୧୦/ ୭ : ଭୁବନେଶ୍ବର ପରେ ବର୍ତ୍ତମାନ କଟକରୁ ଡେଙ୍ଗୁ ସଂକ୍ରମିତ ଚିହ୍ନଟ ହୋଇଛନ୍ତି । କଟକର ୨୩ ଓ ୨୪ ନମ୍ବର ଓ୍ୱାର୍ଡଠାରୁ ଆରମ୍ଭ କରି ବିଡାନାସୀ ଓ ଥୋରିଆ ସାହିରେ ଡେଙ୍ଗୁ ରୋଗୀ ଚିହ୍ନଟ ହୋଇଛନ୍ତି ।
ଡେଙ୍ଗୁ ସଂକ୍ରମିତ ଚିହ୍ନଟ ହେଉଥିଲେ ସୁଦ୍ଧା ମଶା ମାରିବା ଲାଗି ପ୍ରଶାସନ ପକ୍ଷରୁ କୌଣସି ବନ୍ଦୋବସ୍ତ କରାଯାଇନି । ଅସରାଏ ବର୍ଷାରେ ରାସ୍ତାଘାଟରେ ପାଣି ହୋଇଯାଉଥିବାବେଳେ ଅଳିଆ ଆବର୍ଜନା ଭରି ରହିଥିବାରୁ ମଶାଙ୍କ ପ୍ରଭାବ ବିସ୍ତାର କରିବାକୁ ବସିଲାଣି ।
ରାଜଧାନୀ ଡେଙ୍ଗୁ ଆତଙ୍କ ବଢୁଥିବାବେଳେ ବର୍ତ୍ତମାନ ଡେଙ୍ଗୁ ସଂକ୍ରମିତ କଟକରୁ ଚିହ୍ନଟ ହେଲେଣି । ପ୍ରଶାସନ ପକ୍ଷରୁ ସଫେଇ ଠିକ୍ ଭାବରେ ହେଉନଥିବାବେଳେ ମଶା ତେଲ ବି ପକାଯାଉନି ।
ସିଏମସି କମମିଶନର କହିଛନ୍ତି, ଡେଙ୍ଗୁ ବ୍ୟାପୁଥିବା ଯୋଗୁଁ ଲୋକଙ୍କୁ ସଚେତନତା କରାଯାଉଛି । ଅଙ୍ଗନବାଡ଼ି ଓ ଆଶାକର୍ମୀ ଘରେ ଘରେ ବୁଲି ସ୍କ୍ରିନିଂ କରିବା ସହ ଏନେଇ ସଚେତନତା କରାଯାଉଛି ।
ଉଲ୍ଲେଖଯୋଗ୍ୟ, ପ୍ରଥମେ ଭୁବନେଶ୍ବରରୁ ଡେଙ୍ଗୁ ସଂକ୍ରମିତ ଚିହ୍ନଟ ହୋଇଛନ୍ତି । ନିଳାଦ୍ରୀବିହାର ଅଞ୍ଚଳରୁ ୨୦ରୁ ଅଧିକ ଡେଙ୍ଗୁ ରୋଗୀ ଚିହ୍ନଟ ହେଲେଣି ।
ଏତେ ସଂଖ୍ୟାରେ ସଂକ୍ରମିତ ଚିହ୍ନଟ ହୋଇଥିଲେ ସୁଦ୍ଧା ପ୍ରାଥମିକ ସ୍ତରରେ ବିଏମସି କୌଣସି ପଦକ୍ଷେପ ଗ୍ରହଣ କରିନି । କେବଳ ସଚେତନ କରାଯାଉଥିବା ପ୍ରତିକ୍ରିୟା ମିଳିଥିବାବେଳେ ସଫେଇ କି ମଶାମରା ଧୂଆଁର ମଧ୍ୟ ବ୍ୟବହାର କରାଯାଉନି ।
