ତାଲିବାନଙ୍କ ନୂଆ ସରକାର ଚୂଡ଼ାନ୍ତ, ମହିଳାଙ୍କୁ ପ୍ରତିନିଧିତ୍ୱ ମିଳିବ ନାହିଁ
କାବୁଲ,୩/୯ : ଆଫଗାନିସ୍ତାନରେ ତାଲିବାନ ପକ୍ଷରୁ ଏକ ଅନ୍ତରୀଣ ସରକାର ଗଠନ ପ୍ରକ୍ରିୟା ଚୂଡ଼ାନ୍ତ ହୋଇଛି । ମୁଲ୍ଲା ଅବଦୁଲ ଗନି ବରାଦର ଅନ୍ତରୀଣ ସରକାରର ମୁଖ୍ୟ ହେବେ । ଏହା ସହିତ ଅନ୍ତରୀଣ ସରକାରର ରୂପରେଖ ବି ଚୂଡ଼ାନ୍ତ ହୋଇଛି ।
ସୁରା ବା ଧର୍ମୀୟ ପରିଷଦ ସରକାର ଚଳାଇବାର ସର୍ବୋଚ୍ଚ ସଂସ୍ଥା ହେବ । ସୁରାରେ ତାଲିବାନର ବରିଷ୍ଠ ନେତାମାନେ ସଦସ୍ୟ ରହିବେ । ଆଫଗାନିସ୍ତାନର କେତେକ ପ୍ରମୁଖ ଜନଜାତି ନେତାମାନଙ୍କୁ ମଧ୍ୟ ଏଥିରେ ସ୍ଥାନ ମିଳିବ ।
ଦୋହାରେ ଥିବା ତାଲିବାନ ରାଜନୈତିକ କାର୍ଯ୍ୟାଳୟର ପ୍ରାୟ ୮୦ ପ୍ରତିଶତ ଲୋକ ଏଥିରେ ସ୍ଥାନ ପାଇବେ । ମାତ୍ର ସୁରାରେ କୌଣସି ମହିଳାଙ୍କୁ ସ୍ଥାନ ଦିଆଯିବ ନାହିଁ ।
ତାଲିବାନର ଏକ ପ୍ରଭାବଶାଳୀ ଗୋଷ୍ଠୀ ହକ୍କାନି ନେଟଓ୍ବାର୍କର ଗୁରୁତ୍ବପୂର୍ଣ୍ଣ ଭାଗିଦାରୀ ରହିବ । ସେହିପରି ଆଫଗାନ ରାଜନୀତିଜ୍ଞ ତଥା ପୂର୍ବତନ ମୁଜାହିଦ୍ଦିନ କମାଣ୍ଡର ଗୁଲବୁଦ୍ଦିନ ହୁକମତୟାର ବି ସରକାରର ଅଂଶଗ୍ରହଣ କରିବେ ।
କିନ୍ତୁ ଏହି ସରକାରରେ ଆଫଗାନିସ୍ତାନର ପୂର୍ବତନ ରାଷ୍ଟ୍ରପତି ହାମିଦ କାର୍ଜାଇ ଓ ଉପରାଷ୍ଟ୍ରପତି ଅବଦୁଲ୍ଲା ଅବଦୁଲ୍ଲାଙ୍କୁ ସ୍ଥାନ ଦିଆଯିବ ନାହିଁ । ସେମାନଙ୍କୁ ଉପଦେଷ୍ଟା କରାଯିବାର ସମ୍ଭାବନା ରହିଛି ।
ତେବେ ଏହି ସରକାର ଏକ ଅନ୍ତରୀଣ ସରକାର ହେବ ଓ ଆଫଗାନିସ୍ତାନର ଏକ ନୂଆ ସମ୍ବିଧାନ ଗଠନ ହେବା ପରେ ଆସନ୍ତା ବର୍ଷ ସ୍ଥାୟୀ ସରକାର ଗଠନ କରାଯିବ ।
