ଅଫିସ୍ ଅଫ୍ ପ୍ରଫିଟ୍ ଅଭିଯୋଗରୁ ମୁକ୍ତ ହେଲେ ୨୨ ବିଜେଡି ବିଧାୟକ, ସ୍ପଷ୍ଟ କଲେ ଭାରତୀୟ ନିର୍ବାଚନ ଆୟୋଗ
ଭୁବନେଶ୍ବର ୧୦/୧୧ : ବିଭିନ୍ନ ଜିଲ୍ଲା କମିଟି ଏବଂ ସ୍ବତନ୍ତ୍ର ବିକାଶ ପରିଷଦ ଅଧ୍ୟକ୍ଷ ଭାବେ ନିଯୁକ୍ତ ହୋଇଥିବା ୨୨ ବିଜେଡି ବିଧାୟକ ସମ୍ବିଧାନର ଅନୁଚ୍ଛେଦ ୧୯୧(୧)(ଏ) ଆଧାରରେ ଅଯୋଗ୍ୟ ନୁହନ୍ତି ବୋଲି ଭାରତୀୟ ନିର୍ବାଚନ ଆୟୋଗ ସ୍ପଷ୍ଟ କରିଛନ୍ତି ।
ମଙ୍ଗଳବାର ଆୟୋଗଙ୍କ ୱେବ୍ସାଇଟରେ ଏହି ସୂଚନା ଦିଆଯାଇଛି । ୨୨ ବିଜେଡ଼ି ବିଧାୟକ ଅଫିସ୍ ଅଫ୍ ପ୍ରଫିଟ୍ ଅଥବା ଲାଭଜନକ ପଦବୀରେ ରହିଥିବା ନେଇ ଅଭିଯୋଗ ହୋଇଥିଲା । ଆଇନଜୀବୀ ସମରେନ୍ଦ୍ର ବେଉରାଙ୍କ ଦ୍ବାରା ଏହି ସବୁ ବିଧାୟକଙ୍କୁ ଅଯୋଗ୍ୟ ଘୋଷଣା କରିବା ପାଇଁ ରାଜ୍ୟପାଳ ପ୍ରଫେସର ଗଣେଶୀ ଲାଲଙ୍କ ନିକଟରେ ଏକାଧିକ ଆବେଦନ ହୋଇଥିଲା ।
ଏହାପରେ ରାଜ୍ୟପାଳ ଇସିଆଇ ପୋଲ୍ ପ୍ୟାନେଲ୍ଙ୍କ ମତ ଲୋଡ଼ିଥିଲେ। ଗତ ଅକ୍ଟୋବର ୧୩ରେ ପୋଲ୍ ପ୍ୟାନେଲ୍ ତାଙ୍କ ମତ ରାଜ୍ୟପାଳଙ୍କୁ ଜଣାଇଛନ୍ତି । ବୈଧାନିକ ଆଇନ ଆଧାରରେ ୨୨ ବିଧାୟକଙ୍କ ମଧ୍ୟରୁ ‘ଅଫିସ୍ ଅଫ୍ ପ୍ରଫିଟ୍’ ପଦବୀରେ ୨୦ଜଣ ଅଯୋଗ୍ୟ ନୁହନ୍ତି ।
ଅନ୍ୟ ଦୁଇ ଜଣ ଭୂପିନ୍ଦର ସିଂହ ଓ ଅନନ୍ତ ନାରାୟଣ ଜେନା ବିଧାୟକ ହେବା ପୂର୍ବରୁ ସେମାନଙ୍କ ପଦବୀରୁ ଇସ୍ତଫା ଦେଇଥିଲେ ବୋଲି ତାଙ୍କ ମତରେ ପ୍ୟାନେଲ ଉଲ୍ଲେଖ କରିଛନ୍ତି । ଏହି ଦୁଇ ବିଧାୟକଙ୍କ ଇସ୍ତଫା ଷୋଡ଼ଶ ବିଧାନସଭା ଗଠନ ପୂର୍ବରୁ ଗ୍ରହଣ କରିନିଆଯାଇଥିଲା ବୋଲି କୁହାଯାଇଛି ।
ପୋଲ ପ୍ୟାନେଲ୍ ମତକୁ ଆଧାର କରି ରାଜ୍ୟପାଳ ଅକ୍ଟୋବର ୨୨ରେ ୮ ପୃଷ୍ଠାର ଆଦେଶ ଜାରି କରିଥିଲେ । ଯେଉଁଥିରେ ସେ ଅଯୋଗ୍ୟ ଘୋଷଣା କରିବା ପାଇଁ ଦାଖଲ କରାଯାଇଥିବା ଆବେଦନଗୁଡ଼ିକର କୌଣସି ଆଧାର ନଥିବା କହିଛନ୍ତି ।
