କଟକ ସିଡିଏରେ ଗ୍ୟାସ୍ ପାଇପ୍ ଲିକ୍, ହୁତୁହୁତୁ ହୋଇ ଜଳିଲା ନିଆଁ
ତପସ୍ୱିନୀ ସାହୁ
କଟକ/ ଓଡ଼ିଶା,୧୩/୧୦: କଟକ ସିଡିଏ ସେକ୍ଟର ୧୦ ଅଞ୍ଚଳରେ ଗ୍ୟାସ୍ ପାଇପ୍ ଲାଇନ୍ ଫାଟି ବଡ଼ ଧରଣର ଅଗ୍ନିକାଣ୍ଡ ଘଟିଛି । ଅଗ୍ନିକାଣ୍ଡରେ ରାସ୍ତା କଡ଼ରେ ଥିବା ଦୋକାନ ଓ ଗୋଟିଏ ଟ୍ରାକ୍ଟର ଡାଲା ସମ୍ପୂର୍ଣ୍ଣ ପୋଡି ନଷ୍ଟ ହୋଇଯାଇଛି ।
ମଙ୍ଗଳବାର ସକାଳ ପ୍ରାୟ ୭ଟାରେ ହଠାତ୍ ରାସ୍ତା କଡ ମାଟି ତଳୁ ନିଆଁ ଉଠିଥିଲା । ଚାରୋଟି ସ୍ଥାନରେ ଏଭଳି ନିଆଁ ଦେଖି ସ୍ଥାନୀୟ ଲୋକେ ଅଗ୍ନିଶମ ବିଭାଗକୁ ଖବର ଦେଇଥିଲେ । ଅଗ୍ନିଶମ ବିଭାଗ ଓ ଗ୍ୟାସ୍ ଅଥରିଟି ଅଫ୍ ଇଣ୍ଡିଆ ଲିମିଟେଡ୍ ବା ଗେଲ୍ କର୍ତ୍ତୃପକ୍ଷ ଘଟଣାସ୍ଥଳରେ ପହଞ୍ଚି ନିଆଁକୁ ଆୟତ୍ତ କରିଥିଲେ । ତେବେ ଭୁତଳ ବିଦ୍ୟୁତ କେବୁଲ ବିଛାଇବା ପାଇଁ କାମ ଚାଲୁଥିବା ବେଳେ ମାଟି ତଳେ ଯାଇଥିବା ଗ୍ୟାସ୍ ପାଇପ୍ ଲାଇନ୍ ଫାଟିଥିବା କୁହାଯାଉଛି ।
ସେପଟେ ଭୁତଳ ଗ୍ୟାସ୍ ପାଇପ୍ ଲାଇନର ନିରାପତ୍ତା ନେଇ ପ୍ରଶ୍ନ ଉଠିଛି । ଗ୍ୟାସ୍ ପାଇପ୍ ଲାଇନ୍ ଫାଟି ନିଆଁ ଲାଗିବା ଯୋଗୁଁ ସ୍ଥାନୀୟ ଅଞ୍ଚଳରେ ରନ୍ଧନ ଗ୍ୟାସ୍ ଯୋଗାଯୋଗ ପ୍ରଭାବିତ ହୋଇଛି । ଗ୍ୟାସ୍ ପାଇପ୍ ଲାଇନ୍ ସଜାଡିବା ପାଇଁ ଗେଲ୍ କର୍ତ୍ତୃପକ୍ଷ ଚେଷ୍ଟା କରୁଥିବା ବେଳେ ପାଣି ପାଇପ୍ ଲାଇନ୍ ମଧ୍ୟ ଫାଟିଯାଇଛି । ଫଳରେ ସ୍ଥାନୀୟ ଅଞ୍ଚଳରେ ପାନୀୟ ଜଳ ଯୋଗାଣ ମଧ୍ୟ ପ୍ରଭାବିତ ହୋଇଛି ।
