ଚନ୍ଦ୍ରବାବୁ ନାଇଡୁଙ୍କୁ ଆଶ୍ୱସ୍ତି; ୩ ମାମଲାରେ ମିଳିଲା ଆଗୁଆ ଜାମିନ୍
ନୂଆଦିଲ୍ଲୀ, ୧୦/୧: ଆନ୍ଧ୍ରପ୍ରଦେଶର ପୂର୍ବତନ ମୁଖ୍ୟମନ୍ତ୍ରୀ ଏନ୍ ଚନ୍ଦ୍ରବାବୁ ନାଇଡୁଙ୍କୁ ଆନ୍ଧ୍ରପ୍ରଦେଶ ହାଇକୋର୍ଟ ୩ଟି ମାମଲାରେ ଆଗୁଆ ଜାମିନ ପ୍ରଦାନ କରିଛନ୍ତି।
ଇନର୍ ରିଙ୍ଗରୋଡ୍ (ଆଇଆରଆର) ମାମଲା, ଅବକାରୀ ନୀତି ମାମଲା ଏବଂ ବାଲି ଖନନ ମାମଲାରେ ହାଇକୋର୍ଟ ବର୍ତ୍ତମାନ ବିରୋଧୀ ଦଳ ନେତା ତଥା ପୂର୍ବତନ ମୁଖ୍ୟମନ୍ତ୍ରୀ ନାଇଡୁଙ୍କୁ ଆଗୁଆ ଜାମିନ ପ୍ରଦାନ କରିଛନ୍ତି।
ପୂର୍ବରୁ, ଦକ୍ଷତା ବିକାଶ ଦୁର୍ନୀତି ମାମଲାରେ ଗତ ବର୍ଷ ନଭେମ୍ବରରେ ହାଇକୋର୍ଟ ତେଲୁଗୁ ଦେଶମ ପାର୍ଟି (ଟିଡିପି) ମୁଖ୍ୟଙ୍କୁ ଜାମିନ ପ୍ରଦାନ କରିଥିଲେ। ଗତ ବର୍ଷ ସେପ୍ଟେମ୍ବର ୯ ତାରିଖରେ ଦକ୍ଷତା ବିକାଶ ମାମଲାରେ ନାଇଡୁଙ୍କୁ ରାଜ୍ୟ କ୍ରାଇମ ଇନଭେଷ୍ଟିଗେସନ୍ ଡିପାର୍ଟମେଣ୍ଟ (ସିଆଇଡି) ଗିରଫ କରିଥିଲା। ସେପ୍ଟେମ୍ବର ୧୦ରୁ ଅକ୍ଟୋବର ୩୧ ପର୍ଯ୍ୟନ୍ତ ସେ ରାଜମୁନ୍ଦ୍ରୀ ସେଣ୍ଟ୍ରାଲ ଜେଲରେ ରହିଥିଲେ।
ଆନ୍ଧ୍ରପ୍ରଦେଶ ରାଜ୍ୟ ଦକ୍ଷତା ବିକାଶ ନିଗମ (ଏପିଏସଏସଡିସି)ର ଆର୍ଥିକ ଦୁର୍ନୀତି ଯୋଗୁଁ ରାଜ୍ୟ ସରକାରଙ୍କୁ ୩୦୦ କୋଟିରୁ ଅଧିକ ଟଙ୍କାର କ୍ଷତି ସହିବାକୁ ପଡ଼ିଛି।
ତେବେ, ନାଇଡୁ କୌଣସି ଭୁଲ ବା ଦୁର୍ନୀତି କରି ନଥିବା କହିଛନ୍ତି ଏବଂ ତାଙ୍କ ବିରୋଧରେ ରୁଜୁ ହୋଇଥିବା ମାମଲାକୁ ଏକ ରାଜନୈତିକ ପ୍ରତିଶୋଧ ବ୍ୟତୀତ ଅନ୍ୟ କିଛି ନୁହେଁ ବୋଲି ଅଭିଯୋଗ କରିଛନ୍ତି।
