ମୁମ୍ବାଇରେ ପ୍ରବଳ ବର୍ଷା ଯୋଗୁଁ ଭୂସ୍ଖଳନ, ୧୧ ଜଣଙ୍କ ମୃତ ଦେହ ଉଦ୍ଧାର
ମୁମ୍ବାଇ,୧୮/୭ : ରବିବାର ଭୋର ସକାଳୁ ମହାରାଷ୍ଟ୍ରର ରାଜଧାନୀ ମୁମ୍ବାଇରେ ପ୍ରବଳ ବର୍ଷା ହୋଇଛି । ବର୍ଷା ଜଳ ଯୋଗୁଁ ରାସ୍ତାଘାଟ ଜଳାର୍ଣ୍ଣବ ହୋଇଯାଇଛି । ରେଳଧାରଣା ବୁଡ଼ିଯାଇଥିବା ବେଳେ ତଳିଆ ଅଂଚଳରେ ଲୋକଙ୍କର ଘରକୁ ପାଣି ପ୍ରବେଶ କରିଛି । ପ୍ରବଳ ବର୍ଷା ଯୋଗୁଁ ଚେମ୍ବୁରର ୱାନୀ ନାକା ଅଂଚଳରେ ଭୂସ୍ଖଳନ ହୋଇଛି । ଫଳରେ ୪ରୁ ୫ଟି ଘର ଚାପି ହୋଇଯାଇଛି । ଅନେକ ଲୋକ ଦବି ଯାଇଥିବା ଜାତୀୟ ଗଣମାଧ୍ୟମ ରିପୋର୍ଟ କରିଛି । ସୂଚନା ପାଇଁ ଏନଡିଆରଏଫ ଟିମ୍ ଘଟଣାସ୍ଥଳକୁ ପହଂଚିଥିଲେ । ରିପୋର୍ଟ ଲେଖାଯିବା ବେଳକୁ ଉଦ୍ଧାର କାର୍ଯ୍ୟ ଜାରି ରହିଛି । ଏହାରି ମଧ୍ୟରେ ୧୧ ଜଣଙ୍କର ମୃତଦେହ ଉଦ୍ଧାର କରାଯାଇଛି । ଏଥିରେ ଜଣେ ମହିଳାଙ୍କ ମୃତଦେହ ମଧ୍ୟ ଅଛି । କୁହାଯାଉଛି ଯେ, ଆହୁରି ୬ରୁ ୮ ଜଣ ଚାପି ହୋଇଯାଇଛନ୍ତି । ତେଣୁ ମୃତକଙ୍କ ସଂଖ୍ୟା ବଢ଼ିପାରେ ।
ହିମାଚଳ ପ୍ରଦେଶ, ଉତ୍ତରପ୍ରଦେଶ ଓ ରାଜସ୍ଥାନର କିଛି ଅଂଚଳରେ ସାମାନ୍ୟରୁ ମଧ୍ୟମ ଧରଣର ବର୍ଷା ହୋଇଛି । କିନ୍ତୁ ଉତ୍ତରପ୍ରଦେଶର ସମତଳ ଅଂଚଳରେ ଶନିବାର ପ୍ରବଳ ଗରମ ଅନୁଭୂତ ହୋଇଛି । ଆଗାମୀ କିଛି ଦିନ ମଧ୍ୟରେ ରାଜ୍ୟରେ ବର୍ଷା ହେବା ନେଇ ପାଣିପାଗ ବିଭାଗ ପୂର୍ବାନୁମାନ କରିଛି । ରାଜସ୍ଥାନର କିଛି ଅଂଚଳରେ ବିଗତ ୨୪ ଘଣ୍ଟା ମଧ୍ୟରେ ସାମାନ୍ୟରୁ ମଧ୍ୟମ ଧରଣର ବର୍ଷା ହୋଇଛି ।
ମୁମ୍ବାଇର ସିୟୋନ ଅଂଚଳ ଏବଂ ଗାନ୍ଧୀ ମାର୍କେଟ ଜଳାର୍ଣ୍ଣବ ହୋଇଛି । ସଡ଼କରେ ପାଣି ଭର୍ତ୍ତି ହୋଇଥିବା ବେଳେ ରେଳଧାରଣାରେ ମଧ୍ୟ ସମାନ ଅବସ୍ଥା ଉପୁଜିଛି । ପରିସ୍ଥିତି ମୁକାବିଲା ପାଇଁ ବିଏମସି (ମୁମ୍ବାଇ ମହାନଗର ନିଗମ)ର କର୍ମଚାରୀ ମୁତୟନ ଅଛନ୍ତି । ବନ୍ୟା ବିପଦ ବଢ଼ିପାରେ ବୋଲି ସେମାନେ ଲୋକଙ୍କୁ ସଚେତନ କରାଉଛନ୍ତି ।
ମୁମ୍ବାଇ ଓ ଏହାର ଆଖପାଖ ଅଂଚଳରେ ଶନିବାର ରାତି ପ୍ରବଳ ବର୍ଷା ହୋଇଛି । ମୁମ୍ବାଇ ବ୍ୟତୀତ ଥାଣେ, ରାୟଗଡ଼, ନଭି ମୁମ୍ବାଇ ଓ ପାଲଘରରେ ଶନିବାର ରାତି ମୁସଲଧାରା ବର୍ଷା ହୋଇଛି । ମୁମ୍ବାଇର ସିୟୋନ, ଚେମ୍ବୁର, କୁର୍ଲା, ଚୁନ୍ନାଭଟ୍ଟୀ, ଭାଡୁପ, ଅନ୍ଧେରୀ, ମଲାଡ, ବୋରୀୱଲୀ ଓ କାନ୍ଦିବଲୀରେ ଜଳାର୍ଣ୍ଣବ ଦେଖାଯାଇଛି ।
