ଡ଼ିଆଇ ପାଇପ ଚୋରି ମାମଲାରେ ୩ ଗିରଫ , ୧୫ ପାଇପ ଉଦ୍ଧାର , ପାଇପ ବିକ୍ରି ନେଇ ତଦନ୍ତ
ପ୍ରସନ୍ନ କୁମାର ପାଇକରାୟଙ୍କ ରିପୋର୍ଟ
ଖୋରଧା, ୧୭/୯ : ଖୋରଧା ଶିଳ୍ପାଞ୍ଚଳ ଥାନା ଅଧୀନ ଗଡ଼ଖୋର୍ଦ୍ଧାସ୍ଥିତ ମା\’ ଗଡ଼ଚଣ୍ଡୀ ମନ୍ଦିର ସମ୍ମୁଖରେ ଥିବା ଏକ ଗୋଦାମ ରୁ ଡକ୍ଟାଇଲ ଆଇରନ (ଡିଆଇ) ପାଇପ ଚୋରି ଅଭିଯୋଗ ମାମଲାରେ ପୁଲିସ ୩ ଜଣଙ୍କୁ ଗିରଫ କରିଛି।
ଏହି ଘଟଣାରେ ଚୋରି ହୋଇଥିବା ୧୫ଟି ଡିଆଇ ପାଇପ ପୁଲିସ ଉଦ୍ଧାର କରିଛି। ଚୋରି ହୋଇଥିବା ପାଇପ କିପରି ଗୋଦାମ ରୁ ବାହାରିଲା ଏବଂ ପରବର୍ତ୍ତୀ ସମୟରେ କାହା କାହା ହାତକୁ ଯାଇଥିଲା, ତାହା ନେଇ ତଦନ୍ତ ଜାରି ରହିଛି।
ଏନେଇ ସ୍ୱଚ୍ଛ ଏନଭରନମେଣ୍ଟ ପ୍ରାଇଭେଟ ଲିମିଟେଡ ସହ ସମ୍ପୃକ୍ତ ଥିବା ଏବଂ ବର୍ତ୍ତମାନ ଭୁବନେଶ୍ୱର ସହିଦନଗରରେ ରହୁଥିବା ପାର୍ଥ ରାୟ, ରାମଗଡ଼, କୋଲକାତା, ପଶ୍ଚିମବଙ୍ଗଙ୍କ ଅଭିଯୋଗକ୍ରମେ ପୁଲିସ ଖୋରଧା ଶିଳ୍ପାଞ୍ଚଳ ଥାନାରେ କେସ୍ ନମ୍ବର ୨୯୩/୨୬, ଭାରତୀୟ ନ୍ୟାୟ ସଂହିତା (ବିଏନ୍ଏସ୍)ର ଧାରା ୩୦୩(୨) ଅନୁଯାୟୀ ମାମଲା ରୁଜୁ କରିଥିଲା। ମାମଲା ରୁଜୁ ପରେ ପୁଲିସ ତଦନ୍ତ ଆରମ୍ଭ କରି ଗୋଦାମ ରୁ ଚୋରି ହୋଇଥିବା ବୋଲି ସନ୍ଦେହ କରାଯାଉଥିବା ୧୫ଟି ଡିଆଇ ପାଇପ ଉଦ୍ଧାର କରିଥିଲା। ଏହି ଉଦ୍ଧାର ପରେ ଘଟଣା ସହ ସମ୍ପୃକ୍ତ ଥିବା ସନ୍ଦେହରେ ୩ ଜଣଙ୍କୁ ପୁଲିସ ଗିରଫ କରିଛି।
ଗିରଫ ବ୍ୟକ୍ତିମାନେ ହେଲେ ଖୋରଧା ଜିଲ୍ଲା ଜଟଣୀ ଥାନା ଅଧୀନ ଦେଉଳବସ୍ତ ଗ୍ରାମର ସୁଶାନ୍ତ ସାମନ୍ତରାୟ (୪୨) ଓରଫ ଗୁଣ୍ଡିଚା, ପଶ୍ଚିମବଙ୍ଗର ପୂର୍ବ ମେଦିନୀପୁର ଜିଲ୍ଲା ସୁତାହାଟା ଥାନା ଅଧୀନ ନନ୍ଦରାମପୁରର ସହଦେବ ବରାଳ (୬୪) ଏବଂ ଖୋରଧା ମଡେଲ୍ ଥାନା ଅଧୀନ ତଳସାହିର ଶିବ ପ୍ରସାଦ ସେଠୀ (୪୫)।
ପୁଲିସର ପ୍ରାଥମିକ ତଦନ୍ତ ଅନୁଯାୟୀ, ସୁଶାନ୍ତ ସାମନ୍ତରାୟ ଖୋରଧା ସହର ଅଞ୍ଚଳରେ ପାଇପ ଫିଟର ଓ ପ୍ଲମ୍ବର ଭାବେ କାମ କରୁଥିବା ଜଣାପଡ଼ିଛି। ଡିଆଇ ପାଇପ ଚୋରି ଘଟଣାରେ ତାଙ୍କ ସମ୍ପୃକ୍ତି ଥିବା ନେଇ ପୁଲିସ ସନ୍ଦେହ କରୁଛି। ସେହିପରି ସହଦେବ ବରାଳ ପାଇପଲାଇନ୍ ଟେକ୍ନିସିଆନ୍ ଭାବେ କାର୍ୟ୍ୟ କରୁଥିବାରୁ ଚୋରି ହୋଇଥିବା ସାମଗ୍ରୀର ହସ୍ତାନ୍ତର ପ୍ରକ୍ରିୟାରେ ତାଙ୍କ ଭୂମିକା ଥିବା ନେଇ ତଦନ୍ତ କରାଯାଉଛି।
ଅନ୍ୟପକ୍ଷରେ, ଶିବ ପ୍ରସାଦ ସେଠୀ ଚୋରି ହୋଇଥିବା ପାଇପ ଗୁଣ୍ଡିଚାଙ୍କଠାରୁ ନେଇଥିବା ଏବଂ ଏଥିପାଇଁ ୪୫ ହଜାର ଟଙ୍କା ଦେଇଥିବା ପୁଲିସ ଜାଣିବାକୁ ପାଇଛି। ଫଳରେ ଚୋରି ହୋଇଥିବା ସାମଗ୍ରୀର ପରବର୍ତ୍ତୀ ହସ୍ତାନ୍ତର ବା ନିଷ୍ପତ୍ତି ପ୍ରକ୍ରିୟାରେ ତାଙ୍କ ଭୂମିକା ନେଇ ମଧ୍ୟ ପୁଲିସ ଖୋଳତାଡ଼ କରୁଛି।
୧୫ଟି ଡିଆଇ ପାଇପ ଉଦ୍ଧାର ହେବା ପରେ ତଦନ୍ତର ଦିଗ ଆହୁରି ବ୍ୟାପକ ହୋଇଛି। କେବଳ ଗୋଦାମ ରୁ ପାଇପ ଯାଇଥିବା ଘଟଣା ନୁହେଁ, ବରଂ ପାଇପ ଗୁଡ଼ିକୁ କିପରି ପରିବହନ କରାଯାଇଥିଲା, କେଉଁମାନେ ଏହାକୁ ଗ୍ରହଣ କରିଥିଲେ ଏବଂ ପରେ ଏହାର ଗତିପଥ କ\’ଣ ଥିଲା, ସେନେଇ ପୁଲିସ ତଦନ୍ତ କରୁଛି।
ଘଟଣା ପରେ ଗୋଦାମ ର ସୁରକ୍ଷା ବ୍ୟବସ୍ଥା ମଧ୍ୟ ପ୍ରଶ୍ନଘେରକୁ ଆସିଛି। ପାଣି ଯୋଗାଣ ଓ ପାଇପଲାଇନ୍ ଭିତ୍ତିଭୂମି ପ୍ରକଳ୍ପରେ ଡି.ଆଇ ପାଇପ ବ୍ୟବହୃତ ହେଉଥିବାରୁ ବହୁ ପରିମାଣର ପାଇପ ଗୋଦାମ ରେ ସଂରକ୍ଷିତ ରହିଥିଲା।
ତେଣୁ ଏତେ ପରିମାଣର ପାଇପ କିପରି ଗୋଦାମ ରୁ ବାହାରିଗଲା ଏବଂ ଦୀର୍ଘ ସମୟ ଧରି ଏହା ନଜରକୁ ଆସିଲା ନାହିଁ କିପରି, ତାହା ମଧ୍ୟ ତଦନ୍ତର ଅଂଶ ହୋଇପାରେ।
ଏହା ପ୍ରଥମ ଘଟଣା ନା ପୂର୍ବରୁ ଗୋଦାମରୁ ଚୋରି ହୋଇଛି, ତାହା ନେଇ ମଧ୍ୟ ପୁଲିସ ତଦନ୍ତ କରୁଛି। ଗିରଫ ୩ ଜଣଙ୍କୁ ପୁଲିସ କୋର୍ଟରେ ହାଜର କରିଛି। ମାମଲାରେ ଅଧିକ ବ୍ୟକ୍ତିଙ୍କ ସମ୍ପୃକ୍ତି, ଚୋରି ହୋଇଥିବା ସାମଗ୍ରୀର ଗତିପଥ ଏବଂ ଉଦ୍ଧାର ହୋଇଥିବା ପାଇପର ପ୍ରକୃତ କାରଣ ସମ୍ପର୍କରେ ତଦନ୍ତ ଜାରି ରହିଛି।
