ଭାରୋତ୍ତଳନରେ ଭାରତକୁ ଆଉ ଏକ ସଫଳତା, ଅଚିନ୍ତା ଶୁଳି ଜିତିଲେ ଗୋଲ୍ଡ ମେଡାଲ
ନୂଆଦିଲ୍ଲୀ, ୧/୮ : ରାଜ୍ୟଗୋଷ୍ଠୀ କ୍ରୀଡାରେ ଭାରତ ତୃତୀୟ ସୁନା ପଦକ ହାସଲ କରିଛି । ୨୦ ବର୍ଷୀୟ ଅଚିନ୍ତା ସେଉଲି ପୁରୁଷ ଭାରତ୍ତୋଳନ ୭୩ କିଲୋ ବର୍ଗରେ ସୁନା ଜିତିଛନ୍ତି । ସେ ସ୍ନାଚରେ ୧୪୩ କେଜିର ଓଜନ ଉଠାଇଥିଲେ । ସେହିପରି କ୍ୱିନ୍ ଆଣ୍ଡ ଜର୍କରେ ସେ ୧୭୦ କେଜିର ଭାର ଉଠାଇବାରେ ସଫଳ ହୋଇଥିଲେ । ମୋଟ୍ ଭାବେ ସେ ୩୧୩ କିଲୋର ଓଜନ ଉଠାଇ ସ୍ୱର୍ଣ୍ଣ ହାସଲ କରିଥିଲେ ।
ତେବେ ସ୍ୱର୍ଣ୍ଣ ହାସଲ ପରେ ଅଚିନ୍ତା କହିଥିଲେ ଯେ, ସେ ବହୁତ ଖୁସି ଅଛନ୍ତି । ଅନେକ ସଙ୍ଘର୍ଷ ପାର୍ କରିବା ପରେ ସେ ଏହି ପଦକ ହାତେଇଛନ୍ତି । ଏହାକୁ ସେ ନିଜ ଭାଇ ଓ କୋଚଙ୍କୁ ସମର୍ପିତ କରିଛନ୍ତି । ଏହାପରେ ସେ ଅଲମ୍ପିକ ପାଇଁ ପ୍ରସ୍ତୁତି କରିବେ ବୋଲି କହିଛନ୍ତି ।
ଏହି ଇଭେଣ୍ଟରେ ଦ୍ୱିତୀୟ ସ୍ଥାନ ହାସଲ କରିଥିଲେ ମାଲେସିଆର ଇରୀ ହିଦାୟତ ମହମ୍ମଦ । ସେ ମୋଟ୍ ୩୦୩ କିଲୋ ଓଜନ ଉଠାଇଥିଲେ । ସେ ଅଚିନ୍ତାଙ୍କଠୁ ୧୦ କିଲୋ କମ ଓଜନ ଉଠାଇ ପାରିଥିଲେ । କାନାଡାର ସାଦ୍ ଡାର୍ସିଗ୍ନୀ ବ୍ରୋଞ୍ଜ୍ ହାସଲ କରିଥିଲେ । ସେ ମୋଟ୍ ୨୯୮ କିଲୋ ଉଠାଇଥିଲେ ।
୨୦୨୨ ରାଜ୍ୟଗୋଷ୍ଠୀ କ୍ରୀଡାରେ ଭାରତ ଏବେସୁଦ୍ଧା ୬ଟି ପଦକ ହାସଲ କରିଛି । ଏହାପୂର୍ବରୁ ଟୋକିଓ ଅଲମ୍ପିକର ରୁପା ବିଜୟୀନୀ ୪୯ କିଲୋ ଭାରତ୍ତୋଳନ ବର୍ଗରେ ସୁନା ଜିତିଥିଲେ । ସେହିପରି ଜେରେମି ଲାଲରିନୁଙ୍ଗା ମଧ୍ୟ ସୁନା ହାତେଇଥିଲେ । ଏତତ୍ ବ୍ୟତୀତ ସଙ୍କେତ ମହାଦେବ, ବିନ୍ଦିୟାରାଣୀ ଦେବୀ ରୁପା ହାସଲ କରିଥିଲେ ଓ ଗୁରୁରାଜା ପୂଜାରୀ ୬୧ କିଲୋ ବର୍ଗରେ ବ୍ରୋଞ୍ଜ୍ ଜିତିଥିଲେ ।
